ASNN – Duket se ëndrra për të synuar titullin e 10-të botëror në Moto GP nuk do të realizohet për Valentino Rosin. Një ditë më parë, piloti italian ka pësuar një aksident me motor dhe ka thyer kërcirin e këmbës së djathtë. Ai i është nënshtruar ndërhyrjes kirurgjikale. Pas kësaj ai do të mungojë në dy garat e ardhshme duke rrezikuar shumë titullin botëror. Kështu, Valentino Rosi është rrëzuar me motor gjatë një séance stërvitore në terren malor.
Bëhet fjalë për një frakturë në kërcirin e këmbës së djathtë, të njëjtë me atë të aksidentit të ndodhur në Muxhelo në 2010-ën. Pas aksidentit të ndodhur 7 vjet më parë, Rosit iu deshën 6 javë për t’iu rikthyer motorit. Sipas mediave vendase, aksidenti ka ndodhur në një aks të vështirë malor dhe këmba e tij ka prekur një shkëmb. I pari që ka folur për mediat ka qenë babai i Valentinos, Graciano.
“Gjendja është e rëndë dhe Vale nuk është aspak optimist, – ka thënë ai, tepër i shqetësuar. – Këmba i dhemb shumë dhe dyshohet për një frakturë”. Për të parë më mirë gjendjen e këmbës së pilotit, mjekët i kanë çarë çizmen dhe kanë kryer më pas ekzaminimet. Rosi u shtrua fillimisht në një spital në Urbino. Më pas, me dëshirën e tij u transferua në “Torrette” të Ankonës.
Atje, ai i është nënshtruar operacionit, gjatë natës së kaluar, të cilin e ka kryer doktor Pascarella. Pas ndërhyrjes mjeku është shprehur optimist. Rosi rrezikon të mos marrë pjesë në dy garat e ardhshme të Botërorit, në atë të Mizanos dhe në Aragon të Spanjës. Duke vështirësuar kështu pretendimet e tij për titullin e 10-të botëror, kur ndodhet 23 pikë larg kryesuesit të Botërorit, Andrea Dovicozos.
Të shumta kanë qenë mesazhet në drejtim të 9 herë kampionit të botës në Moto GP. Midis tyre ka qenë edhe ish-rivali dhe bashkatdhetari Maks Biaxhi, i cili shkruan kështu të mbiquajturit “Doktor”: “I uroj sinqerisht fat Valentinos, duke shpresuar që gjendja e tij të mos jetë shumë e rëndë. E kuptoj dhimbjen e tij e më vjen keq për të dhe kampionatin e tij”.
