ASNN – Do të jetë një “deja vu” beogradase për Skënderbeun vazhdimi i aventurës kontinentale, pasi skuadra korçare do të përballet në kuadër të grupit B të Ligës së Evropës. Ka qenë ky verdikti i shortit të fazës së grupeve, të hedhur të premten pasdreke në Monako, ndërsa dy skuadrat e tjera të grupit janë Dinamo e Kievit dhe “Jang Bojs” e Bernës. Siç dihet, edhe ky sezon i Ligës së Evropës do të sillet për sportdashësit drejtpërdrejt nga Rrjeti i Radio-Televizionit Shqiptar.
Në një kapriçio të shortit, do të jetë sërish një skuadër shqiptare, e për më tepër, që për ironi të fatit quhet “Skënderbeu”, ajo që do të zbresë për herë të dytë brenda këtyre 3 viteve të fundit në fushën e blertë të stadiumit të Beogradit, për t’u përballur, këtë radhë, me Partizanin vendas. Ka qenë ky verdikti i shortit të fazës së grupeve, të hedhur të premten pasdreke në Monako, ndërsa dy skuadrat e tjera të grupit janë Dinamo e Kievit dhe “Jang Bojs” e Bernës.
Pas asaj sfide të 14 tetorit 2014, ku bota përcolli pamje që s’kishin asgjë të përbashkët me futbollin, pasi ndeshja Serbi-Shqipëri u ndërpre për shkak të dhunës, për t’i dhënë fillimisht fitorja në tavolinë serbëve nga UEFA, por për t’i kthyer pastaj Shqipërisë nga KAS-si i Loznës, tanimë është radha e Skënderbeut për të treguar karakter në këtë përballje. Midis grupeve të tjera, spikat K, ku Lacio përballet me Nisën, Zulte Varegemin dhe Viteshen e Arnhemit.
Ndërsa Milani, i rikthyer pas vitesh mungesë në arenën kontinentale, do të ketë një sfidë relativisht të lehtë në grupin D, ku do të përballet me Austrinë e Vjenës, Rijekën dhe me AEK-un e Athinës. Siç dihet, edhe ky sezon i Ligës së Evropës do të sillet për sportdashësit drejtpërdrejt nga Rrjeti i Radio-Televizionit Shqiptar. Ndeshjet e fazës së grupeve do të luhen më 14 dhe 28 shtator, më 19 tetor, 2 dhe 23 nëntor dhe 7 dhjetor 2017, ndërsa shorti i turit të 32-shes hidhet më 11 dhjetor 2017.
