Kupa “Brahim Syka” në çiklizëm ka ulur siparin e saj dje në mesditë. Kanë qenë dy etapa, njëra më e fortë se tjetra, që i kanë dhënë bukuri kësaj veprimtarie, e cila iu kushtua një prej figurave më të spikatura të çiklizmit shqiptar të viteve ’80-të, shkodranit Brahim Syka. Një veprimtari kjo që, më së shumti, foli për çiklizmin shkodran, kjo edhe për meritë të trajnerit Leonard Kola.
Mes tyre është edhe djali i tij, Bruno Kola, një çiklist ky i ri 16 vjeçar që me të dhënat e përsosura fizike, por edhe teknike, të paktën sipas specialistëve do të jetë një “Agim Tafil” i ardhshëm. Pasi ka fituar të mërkurën etapën e parë, atë Milot-Shkodër për kadetë dhe të rinj, Bruno Kola ka bërë të njëjtën gjë edhe në të dytën. Bëhet fjalë për Shkodër-Gomsiqe dhe kthim 64 kilometra e gjatë me kohën 1 orë dhe 40 minuta.
Pas tij, në vend të dytë dhe të tretë, me një dhe dy sekonda më tepër janë renditur Arjan Alija i Teutës dhe Edison Cani i Vllaznisë. Në garën për Nën-23-vjeçarët/Elitën, Shkodër-Pukë e kthim, 82 kilometra e gjatë, fitues është shpallur Altin Sufa i Apolonisë me kohën 2 orë, 13 minuta dhe 94 sekonda, i ndjekur me një sekondë më shumë nga Marolino Hoxha.
Ndërsa në vend të tretë është renditur Olsian Veliaj i Tiranës me kohën 2 orë, 16 minuta dhe 45 sekonda. Në përfundim të veprimtarisë, organizatorët zhvilluan ceremoninë e mbylljes ku u ndanë diplomat dhe kupat përkatëse. Ndërkohë presidenti i Federatës Shqiptare të Çiklizmit, Skënder Anxhaku, ka nderuar me titullin “Mirënjohje”, Brahim Sykën.
