Që në fjalët e tij të para, shkodrani i stolit kuqezi të femrave është dukur në siklet që në fakt do të ketë kundërshtar Kosovën. Jo vetëm për shkak të afërsisë vëllazërore. Por dhe për faktin se në shumicën e periudhës, jo vetëm Shqipëria e femrave, por dhe të gjitha kombëtaret, kanë qenë të mbështetura tek futbollistët kosovarë. E tashmë që Kosova është bërë kombëtare më vete dikush dhe ka ikur e dikush tjetër ka qëndruar sepse ka luajtur në ndeshjet e fundit zyrtare të vlefshme për Kampionatin Evropian, që sivjet bëhet në Holandë.
“Së pari, – thotë Grima, – më duhet të sqaroj se objektivi ynë është kualifikimi dhe vazhdimi më tej i fazës eliminatore të Kampionatit Botëror. Sigurisht që nuk do ta kisha dashur ta kisha Kosovën kundërshtar, sepse jo vetëm që jemi afër dhe kemi bërë miqësore të shumta, por të themi të drejtën është kundërshtar më i fortë se sa ne. Ndaj do të kisha dashur një kundërshtar më të dobët se Kosova. Është kënaqësi të luash, fati i keq që jemi përballë kështu, sepse e theksoi dhe një herë nuk do të kisha dashur ta kisha kundërshtar.”
“Greqia është kokë-grupi dhe si e tillë është një kombëtare më me vlera të mëdha se sa ne. Megjithatë ne do të bëjmë më të mirën, – vijon ai. – Ashtu siç kemi pësuar dhe kemi shënuar. Deri më tani kemi qenë në një periudhë prove, tanimë objektivi final është kualifikimi”. Për të vetmen lojtare që është diskutuar mes Shqipërisë dhe Kosovës është Qëndresa Krasniqi, e cila në fakt ka luajtur në ndeshjen zyrtare ndaj Rumanisë në Eliminatoret e fundit. “Unë shpresoj që të jemi më të fortë se sa Kosova. Do të mundohemi të bëjmë më të mirën”.
Lista e lojtareve të grumbulluara nga trajneri Armir Grima:
Portiere: Marigona Zani (TSV JahnKalden Gjermani), Viona Rexhepi (Hajvalia Kosovë)
Mbrojtëse: Albina Rrahmani (FC Bergheim Austri), Arbiona Bajraktari (Vllaznia), Lucie Gjini (Vllaznia), Arbenita Curraj (Hajvalia Kosovë), Denisa Proto (Vllaznia), Erida Bajrakurtaj (Kinostudio), Cyme Lumaj (Kinostudio)
Mesfushore: Ezmeralda Franja (Vllaznia), Lavdie Begolli (JYPK Finlandë), Suada Jashari (Vllaznia), Megi Doçi (Vllaznia), Dafina Memedov (Suedi), Endrina Elezaj (Hajvalia Kosovë), Sara Maliqi (Vllaznia), Geldona Morina (FSV Gutersion Gjermani), Qendresa Krasniqi (Iverdon Zvicër)
Sulmuese: Fortuna Velaj (Amerikë), Saranda Hashani (FC Luzernë Frauen Zvicër), Uendi Muja (Vllaznia), Zylfie Bajramaj (Hajvalia Kosovë)
Kalendari i ndeshjeve të grupit B
6 prill 2017:
Shqipëri – Kosovë ora 12:00 “Elbasan Arena”
Greqi – Maltë ora 14:00 “Selman Stërmasi”
8 prill 2017:
Greqi – Kosovë ora 12:00 “Selman Stërmasi”
Maltë – Shqipëri ora 14:00 “Elbasan Arena”
11 prill 2017:
Shqipëri – Greqi ora 14:00 “Selman Stërmasi”
Kosovë – Maltë ora 14:00 “Elbasan Arena”
