ASNN – Shqipëria është mundur të martën në mbrëmje nga Bosnjë-Hercegovina me rezultatin 1-2, në atë që ishte miqësorja e 3-të midis dy vendeve ballkanike dhe që u soll për sportdashësit drejtpërdrejt nga Rrjeti i Radio-Televizionit Shqiptar. Dy golat e boshnjakëve që në pjesën e parë, e kanë të pavlefshëm golin e vetëm të kuqezinjve, me autor Balajn.
Ka rezultuar një eksperiment i pasuksesshëm ai i trajnerit Xhovani De Biazi në ndeshjen e së martës me Bosnjë-Hercegovinën, pasi një Shqipëri me një numër emrash të rinj, apo të aktivizuar pak në ndeshjet e fundit, është mundur me rezultatin 1-2 nga rivalja ballkanike.
11-shja me të cilën e nisi ndeshjen italiani me pasaportë shqiptare, e përbërë nga Strakosha në portë, Hysaj, Veseli, Hysaj, Veseli, Kukeli, Alla dhe Aliji në mbrojtje, Hyka, Memushaj, Basha dhe Llullaku në mesfushë dhe Balaj i vetëm në sulm, ka pësuar dy gola në pjesën e parë, duke bërë në tërësi një paraqitje me shumë dritëhije dhe gabime.
Që në minutën e 7-të, duke përfituar nga një ndërhyrje e panevojshme e mbrojtjes kuqezi, boshnjakët fitojnë një 11-metërsh, që shndërrohet në gol nga sulmuesi i Romës, Edin Xheko. Miqtë do të vijojnë ta dominojnë lojën dhe të gjejnë edhe një gol tjetër në pjesën e parë, në minutën e 43-të, kur Senad Luliç përfiton nga mefshtësia e qendërmbrojtësve të Shqipërisë dhe përshëndet rrjetën.
Në pjesën e dytë, De Biazi do të kthejë në fushë disa prej titullarëve të konfirmuar si Ajeti, Roshi e Cikalleshi dhe loja e kuqezinjve ndryshon dhe Balaj do të gjejë rrugën e rrjetës në minutën e 69-të. Kombëtarja kuqezi do të jetë më agresive në minutat e mbetur, duke qenë madje edhe pranë barazimit, por në fund Bosnjë-Hercegovina triumfon 2-1, duke marrë fitoren e dytë në 5 sfidat me Shqipërinë, ku ka pësuar vetëm një humbje.
