ASNN – Për sfidën e së premtes me Italinë, trajneri i Shqipërisë, Xhovani De Biazi ka kërkuar përkushtim maksimal nga futbollistët e tij. “Nëse zbatojnë detyrat dhe nuk bëjnë gabime foshnjarake, atëherë edhe rezultati pozitiv nuk do të mungojë”, – ka thënë trajneri italian. Kombëtarja shqiptare ka mbërritur mesditën e së enjtes në Palermo për t’u përgatitur për sfidën e së premtes me Italinë.

Trajneri i kuqezinjve, Xhovani De Biazi, ka ardhur vjen në këtë ndeshje me bindjen se skuadra që ai drejton mund të arrijë një rezultat pozitiv ndaj vendasve. “Fitorja do të jetë një kënaqësi, – ka thënë ai. – E nëse do të ndodhë, nuk do të ndjehem aspak në faj. Ne duhet të luajmë në fushë me shumë kujdes, të mos bëjmë gabime foshnjarake, e të vëmë në vështirësi kundërshtarin.”

“Të mbrohemi mirë e të kundërsulmojmë, duke shfrytëzuar rastet që do të na krijohen”, – shtoi italiani me pasaportë shqiptare. Përsa i përket asaj se kush do të luajë në portë, Hoxha apo Strakosha, De Biazi përgjigjet: “Do të jetë një surprizë”. Nëse do të arrijë Shqipëria të marrë një mrekulli të premten në Palermo, duke fituar nga Italisë? “Nuk e di se çfarë mrekullie do të sjellë në fushë Jezusi”, – ka thënë trajneri kuqezi.

“Por unë di që ne duhet të luajmë me shumë kujdes dhe t’i krijojmë vështirësi Italisë të dalë në lojën e saj” – ka shtuar me tej De Biazi. Përsa i përket formacionit, trajneri nuk ka dhënë asnjë detaj, por ka theksuar se ka ende 3-4 lojtarë ende në dyshim. Në konferencën për shtyp ka munguar kapiteni Ansi Agolli, të cilin, trajneri italian e ka justifikuar me vonesën e avionit.

Ndërkohë që gjatë seancës stërvitore të pasdites, në Stadiumin “Renzo Barbera”, është dëmtuar Arlind Ajeti. Ai ka kryer stërvitje të diferencuar dhe vetëm në orët në vazhdim do të merret vesh nga stafi mjekësor nëse ai do të jetë i gatshëm për të luajtur të premten në mbrëmje apo jo. Ky është një lajm i keq për skuadrën kuqezi, kur dihet që në qendër të mbrojtjes mungojnë edhe Gjimshiti dhe Mavraj.