ASNN – Besëlidhja ka mposhtur Burrelin me rezultatin minimal 1-0, në takimin e zhvilluar të hënën dhe të sjellë për sportdashësit drejtpërdrejt nga Rrjeti i Radio-Televizionit Shqiptar. Goli i Ndrecës në pjesën e parë u ka mjaftuar lezhjanëve që ta ngushtojnë në vetëm 2 pikë hendekun që i ndan nga Kamza kryesuese në grupin A.
Rrjeti i Radio-Televizionit Shqiptar ka sjellë të hënën edhe takimin e fundit të javës së 20-të të Kategorisë së Parë, atë midis Besëlidhjes dhe Burrelit. Kjo ndeshje, që u luajt pasdreke në Stadiumin “Besëlidhja” të Lezhës, ishte e vlefshme për grupin A. Fati i kësaj sfide është vendosur në minutën e 25-të të pjesës së parë, kur Ndreca godet bukur në hyrje të zonës dhe mposht portierin e Burrelit.
Pavarsisht minutave të mbetura të pjesës së parë dhe pjesës së dytë, nuk ka më gola të tjerë dhe lezhjanët mbajnë vendin e dytë në renditje, me 26 pikë, por duke e ngushtuar tanimë në vetëm 2 pikë hendekun që i ndan nga Kamza kryesuese në grupin A. Ndërkohë, Burreli renditet i fundit në minigrupin e betejës për titull, me 13 pikë.
Kategoria e Parë, e cila i ka luajtur të shtunën dy ndeshjet e para të javës së saj të 20-të, që është në fakt java e dytë e fazës së 3-të, ka vijuar të dielën me një tjetër takim. Vendasit fituan me shifrat 3-1 dhe kanë rimarrë kreun e renditjes së grupit B, me 26 pikë, dy më tepër sesa Bylisi, që mundi dje në Ballsh Tomorin me rezultatin 2-0.
