ASNN – Kombëtarja e Nën-19-vjeçareve të Shqipërisë në futboll për femra, ka fituar ndaj Malit të Zi në miqësoren e luajtur dje në Stadiumin “Loni Papuçiu” të Fierit. Lojtaret kuqezi kanë luajtur më mirë, e kanë dominuar ndeshjen dhe kanë fituar me meritë, falë golit të shënuar nga Klarita Myrtollari në minutën e 25-të. Ndeshja ka nisur e shpejtë dhe në minutën e tretë kapitenia Uendi Muja ekzekuton një goditje dënimi nga 25 metra dhe topi kalon mbi traun e portës malazeze.
Në minutën e 12-të, Myrtollari rrëzohet brenda zonës, pas ndërhyrjes së portieres Cabarka, por gjyqtari Cjapi vazhdon lojën. Për të ardhur në minutën e 25-të; goditje e lirë për Shqipërinë, kapitenia Muja, një lojtare me shumë personalitet, harkon nga e majta dhe Myrtollari, e gjendur në shtyllën e dytë të portës malazeze, gjuan saktë me të djathtën dhe shënon. Pa kaluar as një minutë, Zarka shënon një tjetër gol, por në pozicion të parregullt.
Rasti më i mirë për mikeshat shënohet në minutën e 30-të, Vujadinoviç harkon nga e djathta, topi grushtohet nga Mulla, por shkon në këmbët e Vuçiçit, që godet fort në hyrje të zonës; veçse rreziku është larguar nga tonat në vijën “fatale”. Në të 40-ën, Zarka gjuan fort në një pozicion ballor me portën malazeze, por pret portierja malazeze me vështirësi në dy kohë. Përfundimisht 1-0 për Shqipërinë e Nën-19-vjeçareve, e cila ka dhënë sinjale pozitive për trajnerin Nevil Dede.
Në tetor, kjo kombëtare do të ndeshet në Tiranë në eliminatoret e Kampionatit Evropian me Spanjën, Ukrainën dhe Azerbajxhanin.
Shqipëri – Mali i Zi 1-0
Shënues: Myrtollari 25’
E mërkurë, 1 mars 2017, ora 11:00
në Stadiumin “Loni Papuçiu”, Fier
Shqipëria: Mulla, Xhindole, Kasa, Jova, Nicku (Çerkini 46’), Doko, Levanaj (Digli 73’), Muja, Begallo (Lufo 70’), Myrtollari, Zarka (Rragami 58’). Trajner: N. Dede.
Mali i Zi: Cabarka, Tosiç, Novoçiç, Nikoliç (Tripkoviç 46’, Moraçanin 90’+2), Coguriç, Lonçar, Topaloviç (Goloviç 65’), Vujadinoviç, Vuçiç, Vranes, Brasnjo. Trajner: D. Haxhiosmanoviç
Gjyqtarë: K. Cjapi, K. Gjyli, E. Kapxhiu (Shqipëri)
Kartonë të verdhë: Begallo / Coguroviç
