Luiza Gega ka thyer të premten rekordin kombëtar të sallave të mbyllura në 1,500 metra, i cili njëkohësisht është edhe rekord për Ballkanin, nga 4 minuta, 6 sekonda e 89 të qindtat, në 4 minuta, 6 sekonda e 66 të qindtat. Sipas trajnerit të saj, Taulant Stërmasi, kundërshtarët në garën e Stambollit kanë qenë shumë të forta. “Mos harroni, – thotë Stërmasi, – që vendi i tretë, Jasemin Xhan, është kampione në fuqi e Evropës në garat e 5,000 dhe 10,000 metrave, si dhe e para në “Kros Kauntri” në Itali.”
“Ndërkohë vendi i dytë, Merijem Akdak, është e 5-ta në Evropian në 3,000 metra me pengesa, si dhe e dyta në “Kros Kauntri”, – ka vijuar trajneri i Gegës. – Kurse atletja që ka dalë e 4-ta, ishte e 3-ta në Evropian pas Luiza Gegës në 3,000 metra me pengesa. Jam i gëzuar me kohën e arritur, ndonëse u vrapua jo aq mirë sa prisja. Turket nuk po e linin Gegën që të merrte kryesimin, dhe u rreshtuan në korsinë e parë dhe të dytë deri në 1,100 metra.”
“Dhe vetëm aty ju dha mundësia për të shpërthyer dhe për të treguar më të mirën, – ka shpjeguar Stërmasi. – Por, qëndrimi pas tyre, e uli ritmin për më shumë se 2-3 sekonda. Megjithatë ishte e para në finish me kohën 4’06”66”.” Ndërkohë në përfundim të mitingut të Stambollit, Gega i është nënshtruar dhe kontrollin antidoping, ndërsa në Iten të Kenias, atje ku ka bërë dhe periudhën përgatitore, i ka pasur me shumicë. Sidoqoftë, vendi i parë në Stamboll, dy rekorde kombëtare brenda një jave, konfirmojnë formën e jashtëzakonshme të së voglës së artë të atletikës shqiptare.
Mitingu Ndërkombëtar i Atletikës
në Salla të Mbyllura – Stamboll 2017
Rezultatet teknike të garës së 1,500 metrave
Nr. Atletja / Vendi Koha
1) LUIZA GEGA (SHQIPËRI) 4’06”66
2) Meriem Akdak (Turqi) 4’09”95
3) Jasemin Xhan (Turqi) 4’11”54
4) Ozlem Kaja (Turqi) 4’12”55
5) Siham Hilali (Marok) 4’13”29
6) Emine Hatun Tuna (Turqi) 4’17”16
7) Damla Çelik (Turqi) 4’44”06
8) Tamara Tverdostup (Ukrainë) s’e mbaroi garën
