Kamza Basket në basketboll për femra nuk ka shkuar në Durrës për të luajtur ndeshjen e radhës me Goga Basket në Pallatin e Sportit “Ramazan Njala”. E vendosur në kalendar për t’u zhvilluar sot në ora 12:00, durrsaket, pasi kishin lajmëruar Federatën Shqiptare të Basketbollit, që ka përcjellë këtë njoftim për gjyqtarët Tafilica e Malevi dhe për vëzhguesin Kalaja, e kanë zhvendosur ndeshjen dje në ora 18:00.

Por dhe pse të gjitha palët kanë pritur 20 minuta sipas rregullores, Kamza Basket nuk është dukur në parket. Madje është bërë dhe mbyllja e protokollit, çka praktikisht Goga Basket duhet ta fitojë këtë ndeshje 20-0 në “tavolinë” për mosparaqitje të kundërshtarit. Por ndërkohë tjetër version ka trajneri i Kamza Basket, Maksim Kristo. “Mua nuk më ka lajmëruar njeri që ndeshja do të luhej nesër (sot)”, – ka thënë ai.

“Përkundrazi kam bërë stërvitje sot (dje) në mesditë, sikurse dhe të enjten pasdite, dhe vajzat janë lajmëruar për t’u nisur sot për në Durrës në ora 08:30, sepse ndeshja me kalendar ishte në 12:00, – ka vijuar trajneri. – Nuk e di nëse kanë lajmëruar tjetër njeri, por ne nuk dimë gjë që ndeshja duhej të ishte luajtur dje.”

Ndërkohë burime të sigurta, përtej fjalëve, që, më shumti, duket sikur janë popullorçe “lloqe Kavaje”, thonë se Kamza Basket ka zgjedhur këtë alternativë për të mos shkuar në Durrës dhe për ta humbur ndeshjen në “tavolinë”. Sepse ndryshe do të ishte përballë një furtune të Gogës, atje ku dhe presidenti i kësaj skuadre, Perikli Goga, kishte kërkuar një sukses të thellë në rezultat.

Përfundimisht Kamza Basket nuk ka shkuar në Durrës dhe pritet që komisionet e Federatës Shqiptare të homologojnë rezultatin, që duhet të jetë 20-0 në “tavolinë” për Goga Basket.

Kampionati Kombëtar

i Basketbollit – Femra

Kategoria e Parë

Java e 12-të

(17-18 shkurt 2017)

Të premten:

Studenti – Skënderbeu                  85-58

Goga Basket – Kamza Basket       nuk u zhvillua

Të shtunën:

Apolonia – Flamurtari                     ora 11:00

Vllaznia – Elbasani                         ora 12:00

Tirana                                                 pushim

Renditja

Nr.       Skuadra                     N.        F.         H.        Psh-Pp           Pikë

1. Tirana                         10        10          0        714-612         20
2. Goga Basket             10          9          1        876-566         19
3. Flamurtari                  10         8          2        784-631         18
4. Studenti                     10          6          4        669-615         16
5. Vllaznia                     10          5          5        670-645         15
6. Elbasani                    10          3          7        720-756         13
7. Skënderbeu              10          3          7        622-723         13
8. Apolonia                    10          1          9        585-838         11
9. Kamza Basket          10          0        10        504-852         10