Në realitet Komiteti Olimpik Kombëtar Shqiptar është një ndër ata që e ka marrë këtë letër nga Komiteti Olimpik Ndërkombëtar, teksa është angazhuar për të vazhduar punën dhe dialogun me qeverinë për autonominë e sportit. Por pyetja që shtrohet është se a jemi ne të gatshëm për sport autonom? Për sa kohë sporti në veçantinë e tij, por dhe Komiteti Olimpik Kombëtar shqiptar merr buxhet nga shteti për të gjitha financimet e aktiviteteve kombëtare e ndërkombëtare nuk ka më pavarësi.
Nuk ka pavarësi sepse për hir të së vërtetës duhet të pranojmë që politika në 24 vjet demokraci, majtas e djathtas, gjithnjë ka imponuar njerëz për t’i vendosur në krye të organizmave sportive në vend. Nuk kemi sport të pavarur edhe sepse infrastruktura, ajo që është themeli i zhvillimit të çdo disipline, duhet rehabilituar me fondet e shtetit. Dhe për rrjedhojë sot kemi një stadium “Elbasan Arena” me dëshirën e mirë të qeverisë për ta bërë atë.
Do të kemi më vonë një “Loro Boriçi” ndryshe po me dëshirën dhe financimet e qeverisë dhe më pas një kampus olimpik po me fonde të qeverisë, të cilat sportin e shfrytëzojnë si një mundësi për shtimin e disa votave më tepër në zgjedhjet e radhës. Ndoshta kjo situatë mund të jetë kudo, sepse nuk ekziston formati i shtetit italian, atje Komiteti Olimpik jo vetëm që është i njohur me kushtetutë, por si një Ministri e mirëfilltë sporti bën politikat e zhvillimit të tij në shtetin e Apenineve.
Dhe më pas kërkesa e llogarisë, kur dhe cakton buxhetet për çdo sport, është më e madhe. E thënë ndryshe, KOKSH e ka marrë letrën e Komitetit Olimpik Ndërkombëtar, sigurisht që do ta vazhdojë dialogun me qeverinë dhe politikën për më shumë autonomi të sportit, por s’e bën dot autonominë e sportit në vend. Sepse kështu siç është katandisur sporti në vendin tonë, deri më tani vetëm peshëngritja i bën krenar të gjithë, është vështirë të afrosh biznesin dhe më pas të kërkosh autonomi.
Dhe kjo sepse ende nuk ka një ligj sporti, i cili do të mund të njohë kontributet e biznesit për sportin. Ashtu sikurse nuk është mbledhur këshilli i sportit. Dhe për rrjedhojë autonomia e sportit e kërkuar nga Komiteti Olimpik Ndërkombëtar, mbështetur me rezolutë nga Kombet e Bashkuara më 3 nëntor, është shumë e vështirë në vendin tonë. Sepse vetë komuniteti i sportit shqiptar duket se e ka të vështirë të jetë i pavarur dhe i shkëputur nga shteti e politika…
