Ligji i ri i sportit bën përcaktimin e statusit juridik të klubeve sportive, i cili do t’i japë status ligjor klubeve sportive aktuale, si dhe përfshirjen e llojit të klubeve shumësportësh, pasi në ligjin aktual mungon. E klubet kanë afat gjashtë muaj për ndryshimin e statusit të tyre aktual, sipas nenit 20. Gjithashtu përcakton përkufizimin e ri të nenit 31 “mbi objektet sportive”, me qëllim moslejimin e ndryshimit të destinacionit të objekteve dhe terreneve sportive nga privatizimi apo dhënia me koncesion i tyre.
Pra të jetë gjithçka në funksion të sportit. Edhe kur të ndërtohen të reja të jenë me kërkesa e standarde ndërkombëtare. Ndërkohë janë të detyrueshme sigurimet shëndetësore për sportistët pjesëmarrës në veprimtaritë sportive. Jo vetëm kaq, por caktohet si detyrim i klubeve sportive për sportistët e tyre dhe federatave sportive për sportistët e ekipeve kombëtare. Madje parashikohet dhe përgjegjësia që organizatat sportive kanë për mbulimin e të gjitha shpenzimeve për rehabilitimin e sportistëve të dëmtuar gjatë veprimtarisë sportive, në rastet kur ata nuk janë siguruar më parë.
Për financimin, në nenin 12, shpjegohet mënyra e financimit dhe burimet financiare të Federatave sportive dhe Komitetit Olimpik Kombëtar Shqiptar. Në këtë nen është parashikuar që delegimi i fondeve buxhetore të bëhet me udhëzimi të përbashkët të Ministrisë përgjegjëse për sportin dhe Ministrisë së Financave duke sjellë për herë të parë një ndryshim rrënjësor të sistemit financiar në sport, pasi organizatat sportive funksionojnë të pavarura dhe si të tilla dhe mbështeten me fondin grand në bazë të programit kalendarik të veprimtarive kombëtare dhe ndërkombëtare që ato miratojnë.
Madje është parashikuar që Ministria përgjegjëse për sportin kontrollon fondet shtetërore që këto organizata përfitojnë, si një e drejtë e institucionit që subvencionon të kontrollojë mënyrën e përdorimi dhe efikasitetin e fondeve te dhëna. Jo vetëm kaq, por lirohen dhe nga detyrimet doganore për materialet sportive, kurse për klubet, apo Federatat janë të parashikuara në ligji përfitimi nga burime dytësore, nga reklamat dhe sponsorizimet, e drejta televizive dhe gjithçka tjetër.
