ASNN – Duhen edhe 5 vjet të tjera deri në organizimin e tij, por Kampionati Botëror i Futbollit në vitin 2022, që do të mbahet në Katar, që tani po ofron shifra të frikshme, sidomos financiare. Qeveria e vendit të Gjirit Persik është duke shpenzuar 500 milionë dollarë në javë për t’i përfunduar projektet e parashikuara, ndërsa vlera e përgjithshme do të arrijë në rreth 200 miliardë dollarë.

Qeveria e Katarit është duke shpenzuar 500 milionë dollarë në javë për t’i përfunduar projektet e parashikuara deri në fillim të Kampionatit Botëror të Futbollit, i cili mbahet atje në vitin 2022. “Po shpenzojmë nga 500 milionë dollarë në javë dhe kështu do të vazhdojmë derisa t’i kryejmë punët, – ka deklaruar ministri i financave të vendit të vogël në Gjirin Persik, Ali Sharif Al-Emadi.

“Vlera e përgjithshme do të arrijë rreth 200 miliardë dollarë, – ka vijuar ai: – Nuk duam të gjendemi në situatë kur kampionati ka filluar, njerëzit janë në vendin tonë dhe ne ende të jemi duke punuar.” Al-Emadi ka theksuar se këto para nuk po shpenzohen vetëm për stadiume, por edhe për hotele, hekurudha dhe spitale. “Paratë janë të sigurta, megjithëse çmimi i naftës ka rënë”, – ka thënë ai.

“Infrastruktura e plotë do të kushtojë 200 miliardë, por nëse llogaritim vetëm objektet për futboll, ky nuk do të jetë botërori më i shtrenjtë”, – ka shtuar Al-Emadi. Megjithatë, duhet theksuar se ky Botëror është njollosur nga procesi i përzgjedhjes së vendit organizator, por edhe nga mënyra e trajtimit të punëtorëve që po kontribuojnë në ndërtimin e stadiumeve, ku nuk kanë munguar edhe incidentet e shpeshta me pasojë vdekjen.