ASNN – Tirana vazhdon të mos e shijojë fitoren në Laç, pasi edhe të dielën është mundur minimalisht në fushën e kurbinasve. Kjo ndeshje, e sjellë për sportdashësit drejtpërdrejt nga Rrjeti i Radio-Televizionit Shqiptar, është vendosur në favor të laçjanëve në minutën e 35-të, nga përforcimi më i fundit i merkatos së dimrit, afrikani Emanuel Mensah.
Me të njëjtat shifra, Kukësi kryesues ka fituar pasdreke ndaj Teutës. Dy takimet e tjera të javës së 20-të të Kategorisë Superiore luhen të hënën dhe, duke nisur nga ora 14:00, Korabi përballet në Stadiumin “Elbasan Arena” me Skënderbeun, ndërsa, duke nisur nga ora 17:00, Flamurtari pret në Vlorë Luftëtarin, në sfidën e fundit të javës.
Ndërkaq të hënën mbyllet edhe java e 14-të e Kategorisë së Parë, me takimin e orës 13:00, midis Kamzës dhe Mamurrasit, që gjithashtu do të sillet për sportdashësit drejtpërdrejt nga Rrjeti i Radio-Televizionit Shqiptar.
