ASNN – Partizani në volejboll për meshkuj e ka “skuqur Fahrie Hoti”, ndërsa duke fituar pastër 3-0 me Tiranën ka shënuar fitoren e nëntë radhazi. Një skuadër që po shkon drejt rekordesh, sepse sot, krahas 27 pikëve të fituara, ka 27 sete të marra dhe vetëm dy të humbura.

Dhe po t’i shtosh dhe tre fitoret në fazën eliminatore të Kupës së Shqipërisë, që shkojnë në total 12 të tilla deri më tani, atëherë janë gjithsej 33 sete të fituara dhe vetëm dy të humbura. Për shkak të këtyre disniveleve edhe tifozeria është e pakët dhe nuk ka atë interes që të zgjonte ndeshja e basketbollit të meshkujve të një dite më parë, Tirana-Vllaznia.

Këtë ka dashur të evidentojë në fund të takimit dhe trajneri Ylli Tomori, megjithëse ka treguar një vlerësim maksimal për kundërshtarin, që sipas tij ka luajtur jashtëzakonisht mirë. Ndërkohë, edhe Farka Volej e vendit të dytë e ka mbyllur gjithçka në 3 sete në Durrës ndaj Teutës vendase, duke u ngjitur në kuotën e 21 pikëve, 6 më pak sesa Partizani kryesues, por 4 më tepër sesa Studenti i vendit të 3-të.

Skënderbeu në volejboll për meshkuj e ka nisur ashtu siç pritej këtë vit të ri, me një humbje të pastër 0-3 në shtëpi përballë Studentit. Miqtë nga kryeqyteti, të drejtuar nga trajneri Ben Sako, e kanë arritur këtë fitore te djeshme, në Pallatin e Sportit “Tamara Nikolla” të Korçës, pa më të voglin problem, teksa e kanë çuar krejt takimin në jo më shumë se 60 minuta.

Vllaznia, që, për efekt kalendari, dje ka qenë pushim, është e 4-ta, me 17 pikë, një më tepër sesa Tirana. Erzeni i vendit të 6-të është ngjitur në kuotën e 13 pikëve, me humbjen e papritur të pësuar dje në fushën e vete në 5 sete përballë Elbasanit, që tashmë ka lënë vendin e fundit të renditjes, ku ka zbritur Teuta, ndërsa, bashkë me Skënderbeun, plotësojnë 3-shen e vendeve të fundit.

Kampionati Kombëtar

i Volejbollit – Meshkuj

Java e 10-të

(4 shkurt 2017)

Të shtunën:

Erzeni – Elbasani                            2-3

Skënderbeu – Studenti                  0-3

Tirana – Partizani                            0-3

Teuta – Farka Volej                         0-3

Vllaznia                                             pushim

Renditja

Nr.       Skuadra         N.        F.         H.        Setet               Pikë

1. Partizani        9          9          0          27-2                27
2. Farka Volej    9          7          2          23-9                21
3. Studenti         9          6          3          18-14              17
4. Vllaznia         8          5          3          18-11              16
5. Tirana             9          5          4          18-14              15
6. Erzeni                        9          4          5          18-17              13
7. Skënderbeu  9          2          7            6-23                6
8. Elbasani        9          1          8            7-26                3
9. Teuta              9          1          8            6-26                2