ASNN – Dinamo nuk ka mundur të marrë më shumë se një pikë në përfundim të ndeshjes me Sopotin. Skuadra dinamovite e ka mbyllur sfidën me rezultatin 0-0 duke kryer më shumë volum loje e më shumë raste. Në pjesën e parë kryeqytetasit krijojnë 3 raste të pastra për shënim, por nuk janë të saktë përpara portës së mbrojtur nga gardiani mik, Bejte.
Edhe pjesa e dytë nis më mirë për vendasit. Në minutën e 62-të, Murataj nuk arrin të shfrytëzojë një rast të pastër, teksa portieri i Sopotit, Bejte, është më i shpejtë. Në të 67-ën, grumbull lojtarësh nga të dy skuadrat para portës së Sopotit, dhe Çaushaj në përpjekje për ta laguar topin nga zona e vet, për pak shënon një autogol, por portieri Bejte është i vëmendshëm.
Në minutën e 69-të, Sopoti krijon një rast me anë të Muratajt. Më pas, në të 73-ën, është Gërxho që gjuan fluturimthi nga jashtë zone, por portieri Bejte largon topin në goditje këndi. Këmbëngul Dinamo, që një minutë më pas, me anë të Shabës, që gjuan rrezikshëm me kokë. Blutë ushtrojnë presion dhe, në minutën e 75-të, është dyshja Alikaj-Gërxho në një kombinim të bukur por mungon finalizmi.
Minuta të mira për vendasit, por pa dobi. Madje, në të 79-ën minutë, është një kundërsulm i Sopotit. Goditje e rrezikshme e Muçollarit nga ana e majtë e sulmit të vet dhe vetëm shtylla horizontale e shpëton portën e Dinamos. Kështu, me rezultatin 0-0 mbyllet ndeshja Dinamo-Sopoti, e cila ishte e vlefshme për javën e 14-të të grupit B të Kategorisë së Parë.
