Briken Calja, peshëngritësi i Shtërmenit, i cili në Lojërat Olimpike “Rio de Zhaneiro 2016” zuri vendin e 5-të duke pasur rezultatin më të mirë të të gjithë përfaqësimit të sportit shqiptar në Olimpiada, nuk ka mbetur pa i kthyer përgjigje Erkand Qerimajt. Peshëngritësi shkodran, në luftën frontale që është duke bërë ndaj drejtuesve aktual të Federatës Shqiptare të Peshëngritjes, e ka akuzuar Caljen për servil të presidentit aktual Elez Gjoza, si dhe që e shfrytëzoi për të shkuar në Olimpiadën e Brazilit. Dhe Calja e ka dhënë një përgjigje, të cilën AlbanianSport.com po e boton të plotë, ndërsa sipas peshëngritësit shtërmenas Qerimaj këtë herë ka gjykuar ulët.
“Erkand, e lexova akuzën tënde, por në ato vargje nuk qëndronte asgjë! – shkruan Calja. – Kishe shkruar me mllef, zgjedhja jote, por unë do të shkruaj me qetësi, sepse i detyrohem një sqarim sportdashësve, tifozëve, njerëzve që më mbështesin dhe familjes sime. Balta mbi mua nuk qëndron dhe nuk ka vend. Në emisionin “Stop” dolëm të dy dhe ngritëm zërin për padrejtësitë, kushtet mjerane në të cilat punon ti, unë dhe sa e sa sportistë. Ti Erkand thua se në atë emision më dole në krahë mua kundër Elez Gjozes, por kjo s’është e vërtetë. Ne dolëm në krahë të së drejtave tona, unë, ti, sikur duhet ta kishin bërë edhe shumë sportistë të tjerë.”
“Më tej, në akuzën tënde më sulmove sikur unë të kam shfrytëzuar për të shkuar në Olimpiadë, – vijon ai. – Jo Erkand, të dy e dimë si shkohet në Olimpiadë, me rezultat. Unë e kisha, e mora me djersë. Por kështu nuk mendoj vetëm unë, është edhe mjeshtri Zef Kovaçi, i cili në një prononcim për Albaniansport.net përpara Olimpiadës së Rios, ka thënë: “Ai (Unë, Brikeni) është në vendin e 6-të në Botëror, që do të thotë se ka një pozicion më të mirë se Qerimaj, – ka sqaruar trajneri shkodran, – Për rrjedhojë, duke qenë më mirë në renditjen botërore, e ka një vend në Lojërat Olimpike.”. Më ke quajtur dhe servil i Elez Gjozës, në fakt për këtë jam më i qetë.”
“Jam më i qetë sepse unë kundërshtoj, denoncoj, përçmoj çdo manovër të institucioneve sportive që ndërmarrin kundër nesh, – ka theksuar shtangisti shtërmenas. – Të gjithë ndjekësit e sportit, mbështetësit, të afërm, gazetarë, emisionet tregojnë se unë s’jam servil i askujt, por vetëm i punës, mundit, arritjeve. Isha unë që kam shkruar nga Rio që do të lija garën në mes kur nga Presidenti i KOKSH u tha se Brikeni merrte bursë olimpike. Por se bëra për ndjekësit, për ata që më besuan, por më pas e gjitha u sqarua, ndërsa doli se unë s’kam marr asnjë lekë. Dhe në fund, më ke quajtur “LSI e Elez Gjozës”, por kjo është diçka akoma më e ulët.”
“Rezultatet e punës sime maten nga komisione evropiane dhe botërore, s’ka lidhje asnjë LSI. Pastaj i dashur Erkand, në zgjedhje të gjithë i drejtohemi një kutie për të votuar, edhe ti e bën. E drejtë demokratike. Unë jam Brikeni, ju jam mirënjohës të gjithëve që më mbështesni, rezultatet e mia janë dhe tuajat. Do të punojmë bashkë. Unë ju premtoj se do ngre lartë flamurin tim, flamurin tonë. Mirënjohje të gjithëve”, – ka përfunduar peshëngritësi i Shtërmenit, Briken Calja, i cili në Lojërat Olimpike “Rio de Zhaneiro 2016” zuri vendin e 5-të, në përgjigjen që i ka kthyer Erkand Qerimajt.
