ASNN – Fiton apo humbet skuadra e tij, kjo s’ka rëndësi. Sepse sulmuesi shqiptar Besart Berisha është duke vijuar me formën e tij të shkëlqyer në elitën e futbollit australian, të njohur ndryshe si “Liga A”.
Ai ka shënuar edhe sot në humbjen që Melbërn Viktorisë pësoi në fushën e Përth Glorit. Berisha kishte rastin të kalonte ekipin e tij në epërsi në fund të pjesës së parë, kur u tregua i pasaktë nga pika e bardhë.
Por, atë që nuk e bëri në pjesën e parë e bëri në të dytën duke realizuar një tjetër 11-metërsh në minutën e 58-të. Por kjo nuk mjaftoi, pasi vendasit arritën më pas të përmbysin rezultatin duke fituar me rezultat 2-1.
Ata i shkaktuan njëherësh edhe humbjen e dytë radhazi ekipit të Besart Berishës. Shqiptari vazhdon të jetë golashënuesi më i mirë në ligë me 13 gola, kurse Melbërn Viktori mban vendin e dytë në renditje, me 32 pikë, 8 më pak sesa FC Sidni në vendin e parë.
