Kampioni i botës, rekordmeni olimpik më 1972-in, është ndarë nga jeta në moshën 73-vjeçare pas një ataku në zemër. Ymer Pampuri nuk është më në familjen e peshëngritjes shqiptare e të sportit shqiptar, ndërsa një atak në zemër dje në mëngjes, në moshën 73-vjeçare, e ka ndarë nga jeta. Vetëm tre vjet më parë, në një nga sallat e hotel “Tirana-Intenational”, i është festuar me madhështi 70-vjetori i lindjes këtij mjeshtri duke premtuar që këtu do të ishte edhe në 80, 90 apo 100 vjetorin e lindjes.
Por jeta e ka ndarë përgjithmonë nga njerëzi kampionin e botës, Ymer Pampuri. Mbi të gjitha rekordmenin olimpik në stilin e forcës në Lojërat Olimpike “Mynih 1972” me 127.5 kg. Ymer Pampuri ka lindur më 30 prill 1944 dhe karrierën si akrobat në cirkun e Tiranës përkrah një tjetër figure të peshëngritjes shqiptare si Telat Agolli. Më pas do të niste rrugën e peshëngritjes duke qenë sportist i 17 Nëntorit. Më 1972 ka konkurruar për Shqipërinë në Kampionatin Evropian të Rumanisë, atje ku ngriti 120 kg.
Kulmi ishte pjesëmarrja në Lojërat Olimpike “Mynih 1972”, ndërsa në moshën 27-vjeçare do të përmbyste japonezin Joshinobu Mijake duke i thyer rekordin olimpik në forcë me 127.5 kg. E jo vetëm kaq, por do të ishte “kampion bote” dhe rekordmen olimpik. Më 1981 lë karrierën si peshëngritës për t’u kthyer në cirk deri më 1994. Pas daljes në pension ka shërbyer si roje tek INIMA, por gjithmonë një figurë e nderuar e peshëngritjes shqiptare.
Nëse ka marrë pjesë në Lojërat Olimpike “Mynih 1972”, atje ku të gjithëve iu duk çmenduri objektivi për medalje e thyerje të rekordit, kjo ka ardhur pas firmës që ka marrë te neurologu Dr. Bajram Preza, që ishte i shëndoshë fizikisht dhe mendërisht. Për gjithçka që ka dhënë Ymer Pampuri është nderuar titullin “Mjeshtër i Madh i Punës” e më pas dhe trofe të tjerë. Madje më 2014-ën është nderuar dhe me medalje nga ndërkombëtarët.
