Në bashkëbisedimin që “Sport Ekspres” kishte me trajnerin e Vllaznisë, Armando Cungu, i pari i stolit kuqeblu është pyetur nëse i frikësohet rivalëve, apo jo. Sepse me kushtet dhe me përforcimet që po vijojnë të kenë në merkato mund të kenë diferenca në raport me to me fillimin e fazës së tretë. Por ky i fundit preferon të përqendrohet kryesisht në grupin e 5 skuadrave të fundit të tabelës së renditjes.

Çka do të thotë se, bazuar në forcat dhe mundësitë që ka aktualisht skuadra e tij, garën dhe rivalitetin e shikon me to për vijueshmërinë e kampionatit. “Besoj që në Shkodër thonë “shih dhe shkruaj”, – ka thënë ai. – Pra nuk ke nevojë për shumë fjalë. Normalisht që kontingjenti i kundërshtarëve tonë, kur them kundërshtarëve tonë më tepër mund të ndalem tek 5-shja e dytë nëse mund të them kështu, është fuqizuar shumë edhe në merkato.”

“Sepse kanë marrë shumë lojtarë dhe kanë bërë më shumë investime në ekipet e tyre për mbijetesë”, – thotë Cungu, i cili, megjithatë, edhe pse me vështirësi, nuk pranon të dorëzohet. “Normalisht që rivalët kanë kushte të tjera, megjithatë kjo nuk do të thotë që ne duhet të jemi pesimistë, por duhet të jemi optimist për vazhdimësinë dhe duhet të shohim mundësitë reale për të përballuar sa më mirë pjesën e dytë të sezonit”, – shton ai.

“Natyrshëm që unë pres përforcime, pasi ekipi ka nevojë për ndërhyrje. Pres që të vijnë sa më shpejt të jetë e mundur këto përforcime, por normalisht lojtarë kualitativ që duhet të futen në momentin e parë. E kam fjalë që në ndeshjen e parë me ekipin dhe jo të presim lojtarë që nuk kanë gjendjen fizike, etj, etj. Sepse nuk kemi kohë për të humbur”, – ka përfunduar trajneri i Vllaznisë, Armando Cungu, duke folur lidhur me këtë çështje.