ASNN – Tanimë është më tepër çështje matematikore sesa mundësi reale, por, sidoqoftë,  SIGAL Prishtina do ta synojë fitoren sonte ndaj Bashkimit, në derbin kosovar të Ligës Ballkanike të Basketbollit për Meshkuj.

Bardhekaltrit kryeqytetas duhet të fitojnë me 12 pikë epërsi ndaj portokallinjve, për t’i mbajtur gjallë shpresat për kualifikim në fazën tjetër të kësaj lige, ndërsa më pas ta mposhtin edhe Kozhuvin në ndeshjen e fundit të fazës së grupeve.

Ndërkohë, edhe prizrenasit nga ana e tyre do të kërkojnë fitoren, ose humbje me pak pikë diferencë, e cila do t’ua siguronte kualifikimin në fazën e ardhshme, atë çerekfinale, që gjithashtu do të zhvillohet me sistem grupesh.

Prishtinasit kanë korrur vetëm dy fitore dhe kanë pësuar 6 humbje në këto 8 ndeshje në Grupin A, ndërsa Bashkimi ka marrë 4 fitore dhe ka pësuar po aq humbje. Siç dihet, kryeqytetasit e kanë fituar këtë veprimtari gjatë dy viteve të fundit.

Kjo ndeshje do të zhvillohet sonte në Prishtinë, duke nisur nga ora 19:00.