ASNN – Ka firmosur para dy ditësh, me skuadrën e Plimuth Rejdërs, duke vijuar dalë dje në stërvitje me skuadrën e tij të re dhe nuk e ka fshehur kënaqësinë që tanimë militon në nivelin më të lartë të basketbollit britanik, të njohur si BBL (Liga Britanike e Basketbollit). Basketbollisti shqiptar, Elvis Dusha, ishte një nga dy përforcimet e dimrit për këtë skuadër, së bashku me Nejthën Skollin, që u prezantuan para medias.
Sipas faqes zyrtare në Internet të klubit britanik, Dusha, i cili ka luajtur më herët këtë sezon në Superligën e Kosovës në basketboll për meshkuj, përpara se të rikthehet në Angli me Riding Rokets, prej nga erdhi edhe tej Plimuth Rejdërs, ndiqej prej afro 4 vitesh nga klubi britanik.
Plimuth Rejdërs kanë shprehur mirënjohjen e tyre për Riding Rokets në mundësimin e transferimit të Dushës, i cili ka luajtur më parë për përfaqësuesen e Nën-20-vjeçarëve të Britanisë së Madhe dhe është kapiteni më i ri në moshë që ka udhëhequr një skuadër të BBL-së, kur luante tek Sërrej. Elvisi, i cili do të sfidojë Ris Karterin për një pozicion në 5-shen titullare, është vlerësuar lart nga trajneri i Plimuth Rejdërs, Xhonatan Uajt.
“Jemi të lumtur që kemi mundur t’i shtojmë skuadrës sonë dy lojtarë mjaft të talentuar, me përvojë të mëparshme në BBL, çka do të na japë ne përvojën dhe qetësinë për të cilën kemi nevojë, – ka thënë ai. – Si Nejthëni, ashtu edhe Elvisi janë lojtarë të zgjuar, me pasion të madh për këtë lojë dhe me botëkuptimin e duhur për atë që kërkohet të konkurrosh në një kampionat si BBL-ja.
“Ne besojmë se të dy këta lojarë mund të luajnë rol aktiv menjëherë për skuadrën tonë dhe e di që këto dy përforcime do të rezultojnë të pëlqyeshëm për tifozët tanë”, – përfundoi trajneri australian i ekipit britanik. Të dy basketbollistët do të jenë në parket që më 22 janar 2017, për ndeshjen e vlefshme për Kupën e Britanisë në Basketboll për Meshkuj.
Dusha ka deklaruar se mezi po pret të zbresë në parket me skuadrën e tij të re. “Jam shumë i lumtur që jam pjesë e Plimuth Rejdërs, – ka thënë ai, duke folur për faqen zyrtare në Internet të klubit britanik. – Kam patur kënaqësinë që të luaj shumë herë këtu, por është një ndjesi e jashtëzakonshme që do të vesh bluzën e gjelbërt dhe të jem pjesën e një skuadre që luan përpara një tifozerie fantastike këtu në “Pavilion”.
Plimuth Rejdërs janë një skuadër e themeluar në 1983-shin, por që iu bashkuan Ligës Britanike të Basketbollit për Meshkuj më 2004-ën, dhe ndeshjet i zhvillojnë në Pallatin e Sportit “Plimuth Paviljion”, me një kapacitet prej 1,500 vendesh. Aktualisht, kjo skuadër renditet e 6-ta në këtë veprimtari, me 14 pikë të grumbulluara pas 13 javësh, ku ka korrur 7 fitore dhe ka pësuar 6 humbje.
Dusha ishte pjesë e kontingjentit të Kombëtares së Shqipërisë, që u rikthye pas shumë vitesh të marrë pjesë në Eliminatoret e Kampionatit Evropian të Basketbollit për Meshkuj, duke konkurruar në një grup të vështirë përballë Malit të Zi, Gjeorgjisë dhe Sllovakisë. Në këto Eliminatore, Shqipëria, edhe falë kontributit të Dushës, bëri një paraqitje dinjitoze, duke gjetur edhe fitoren e parë pas 7 vitesh, atë ndaj Sllovakisë në Tiranë.
