ASNN – Methju Bonifeis është futbollisti i ri që do të veshë fanellën e Partizanit përgjatë dy fazave të mbetura të kampionatit. 22-vjeçari nga Nigeria është prezantuar të mërkurën nga drejtori i përgjithshëm i klubit, Genci Tomori, dhe do të mbajë fanellën me numër 9. Bonifeis fillimisht ka ardhur në Shqipëri për të luajtur me Skënderbeun, por për arsye dokumentacioni nuk mundi të aktivizohej.
Gjatë kësaj kohe ka luajtur me Trepçën në Kosovë. I njoftuar si blerja e parë në merkaton e janarit, nigeriani, është prezantuar në klubin e kuq, duke zbuluar edhe arsyet pse firmosi. “Pranova të vij tek Partizani sepse zyrtarët e klubit janë sjellë me mua si prindi me fëmijën, – ka thënë Bonifeis. – Klubi ka bërë gjithçka që unë të vija këtu dhe për këtë jam shumë i kënaqur.”
Ai e quan më të fortë kampionatin shqiptar dhe Partizanin një skuadër të aftë për të fituar titullin “kampion”. Sulmuesi nigerian duket se i ka idetë e qarta. Ai tregon edhe etje për të fituar.” Vij për të shënuar gola dhe për të dhënë ndihmën time në realizimin e objektivit, fitimin e titullit “kampion”, – ka thënë 22-vjeçari. – Partizani ka 99 % shanse për të fituar kampionatin.”
“E di që skuadra dhe futbollistët japin maksimumin në fushë, kështu që jemi në rrugën e duhur”, – ka shtuar ai. Ndërkaq, i pyetur a do të ketë afrime të tjera në skuadër, drejtori i përgjithshëm i Partizanit, Genci Tomorri është përgjigjur se do të ketë afrime lojtarësh cilësorë, të cilët do të studiohen mirë nga drejtuesit e klubit. Ekipit do t’i bashkohet për t’u provuar një futbollist nga Gambia.
Prova dhe ndeshjet miqësore që do të përcaktojë nëse ai është një lojtar i vlefshëm për klubin. Përveç Sukajt dhe Mazrekajt që do t’i bashkohen skuadrës, pa përmendur emra konkretë, ai shtoi se lojtarët e rinj do të shikohen gjatë fazës përgatitore që do të zhvillojë skuadra në Turqi. Në stërvitjen e sotme të të kuqve ka marrë pjesë edhe Xhevahir Sukaj.
Ai pritet ta riveshë fanellën e Partizanit nëse do të zgjidhë problemet me ekipin Perak të Malajzisë. Me 6 janar 2017, Partizani do të niset për në Antalja, ku do të zhvillojë një fazë përgatitore prej 10 ditësh.
