Ligji për Sponsorizime, i miratuar në Kuvendin e Kosovës, jep shpresë për zhvillim të hovshëm të sportit kosovar. Kjo pasi sponsorizuesit në sport do të kenë 30 % zbritje nga tatimi në fitim. Në këtë mënyrë, Kosova vendosi ta ndjekë praktikën e njërës prej shteteve me sportin më të zhvilluar, e pikërisht Gjermanisë. Për punën e bërë po ndihen krenarë të gjithë ata që kontribuuan në këtë ligj: anëtarë të grupeve punuese, zyrtarë qeveritarë, deputetët që e votuan kalimin e tij e mbi të gjitha Komisioni Parlamentar dhe FC Prishtina, e cila ofroi shembullin gjerman e që u pranua nga vendimmarrësit shtetërorë.
Gjermania është njëra prej shteteve me sportin më të zhvilluar në botë. Dhe, këtë e ka arritur falë Ligjit për Sponsorizime, i cili i ndihmoi jashtëzakonisht shumë zhvillimit të sportit gjerman. Ndërkohë, metoda gjermane tashmë është përcjellë edhe në sportin kosovar, i cili pas shumë vitesh zvarritjesh e pritjesh, më në fund u bë me Ligj për Sponsorizime, i cili është miratuar në Kuvendin e Kosovës dhe shumë shpejt pritet të hyjë në fuqi. Ajo që vlen të përmendet se Ligji për Sponzorizime në Kulturë, Rini dhe Sport është thuajse krejt i ngjashëm me atë gjerman, gjë që jep shpresa dhe mundësi për zhvillim të këtyre sektorëve në Kosovë/
Sipas ligjit të sapomiratuar, sponsorizuesve në sport do t’u njihen zbritjet prej 30 % të tatimit në fitim. Këso lehtësirash gëzojnë edhe sponsorizuesit në sportin gjerman. Kurse, sponsorizuesve në sektorët e Kulturës dhe Rinisë do t’u njihen zbritjet prej 20 % të tatimit në fitim. Ky ligj i ka dhënë shpresë të madhe për çuarjen përpara të sportit të Kosovës, i cili edhe ashtu është promovuesi kryesor i saj në arenën ndërkombëtare, edhe pse ballafaqohet me probleme nga më të ndryshmet, të cilat zanafillën e kanë pikërisht te kriza financiare dhe mungesa e madhe e donatorëve, të cilët nuk kishin pse të sponsorizonin në sport pa kurrfarë kompensimi.
Në këtë mënyrë, institucionet shtetërore meritojnë komplimente për punën e bërë, pasi rrallëherë bëjnë gjëra të tilla pozitive, sidomos në sportin e lënë pas dore. Kurse, miratimi i Ligjit për Sponsorizime konsiderohet si hapi më i madh drejt zhvillimit të sportit në Kosovën e pasluftës. Dhe, merita për këtë kanë anëtarët e grupeve punuese, zyrtarë të lartë qeveritarë, deputetë që kanë votuar “pro” tij e mbi të gjitha anëtarët e Komisionit Parlamentar për Arsim, Shkencë, Teknologji, Kulturë, Rini dhe Sport, të cilët e kanë dhënë maksimumin nga vetja për bërjen e Kosovës me këtë ligj shumë të nevojshëm.
Pa dyshim, merita ka edhe FC Prishtina, e cila ishte nismëtare që Ligji për Sponsorizime i Kosovës të përpilohet konform atij gjerman, për çka kishte ndërmjetësuar edhe takim në Frankfurt ndërmjet ligjvënësve kosovarë me ata gjermanë, për çka ideja dhe insistimi i klubit më të madh në futbollin kosovar ishte mirëkuptuar drejt nga Komisioni Parlamentar për Arsim, Shkencë, Teknologji, Kulturë, Rini dhe Sport. Mirëkuptimi, bashkëpunimi dhe vullneti i palëve të lartpërmendura ka bërë që Kosova të bëhet me një ligj mjaft pozitiv, gjë që i ka bërë krenarë të gjithë ata që kanë kontribuuar.
