Federata Shqiptare e Peshëngritjes, sipas informacionit që ka dhënë dje presidenti Elez Gjoza, që nga data 22 dhjetor 2016 ka nisur një kurs teoriko-praktik për trajnerët e saj. Një kurs që do të përfundojë më 29 dhjetor dhe ku marrin pjesë 20 trajnerë. Mungojnë vetëm Vasil Hoço i Partizanit, Leonard Toska i Shtërmenit dhe Sotiraq Dhamanica i Skënderbeut. Seminari është duke u zhvilluar me shpenzimet e Federatës Botërore të Peshëngritjes
Në këtë seminar, sipas informacionit që ka dhënë Federata Shqiptare e Peshëngritjes, janë duke u trajtuar tema të ndryshme, ndërsa janë duke marrë pjesë gjallërisht në këtë kurs, atje ku janë duke shkëmbyer eksperiencat e tyre të pasura gjatë garave kombëtare dhe ndërkombëtare. Ndër temat më të spikatura janë ato të ndarjes së ngarkesës mes periudhës stërvitore dhe garës, stilet klasike dhe realizimi me saktësi i tyre.
Ndërkohë trajnerët në këtë seminar janë njohur dhe me sistemin ADAMS. Pritej të vinte në ketë seminar Vladimir Lepilin, ish-trajner i kombëtares së Rusisë dhe pjesëmarrës në kursin tremujor më 2002-in me trajnerët e peshëngritjes shqiptare. Lektorët e këtij seminari janë Akademiku Gudar Beqiraj, Mjeshtri Evropian i Sportit, Agron Haxhihyseni dhe Marsel Xhemollari.
Në fjalën e tij të hapjes, presidenti i Federatës Shqiptare të Peshëngritjes, Elez GJOZA, deklaroi se ky seminar do të ndiqet edhe nga të tjerë, të cilët do të drejtohet nga lektorë të huaj e vendës. Në fund të kursit trajnerët pjesëmarrës do të pajisen me diploma dhe disa dhurata për Vitin e Ri. Në këtë seminar teoriko-praktik me trajnerët e peshëngritjes janë të ftuar dhe lektorë nga Universiteti i Sportit, Komisioni Kombëtar i Antidopingut dhe Agjencia e Shërbimit të Sporteve.
Trajnerët pjesëmarrës në kursin teoriko-praktik:
Asim Belinova (Vllaznia), Artur Lagja (Vllaznia), Severin Lushi (Alba 2008), Enerik Rexhaj (Alba 2008), Mikel Lundraxhiu (Peqini), Amarildo Gjyli (Lushnja), Hysen Cenaj (Flamurtari), Kastriot Rukaj (Flamurtari), Islam Kurti (Masglass), Hektor Shaqiri (Masglass), Sokol Bishanaku (Tirana), Agron Gjokaj (Studenti), Julian Bajramaj (StudentI), Elvis Vulka (Dinamo), Riza Fejzullahu (Apolonia), Flamur Kafarani (Apolonia), Ilir Çela (Elbasani), Endri Karina (Elbasani), Sami Pulaku (KS Ymer Ferhati), Edmond Ballhysa (Alba 2008)
