ASNN – Erzeni-Kamza ishte ndeshja e radhës e transmetuar nga Radio-Televizioni Shqiptar, e vlefshme për Kategorinë e Parë të Kampionatit Kombëtar të Futbollit. Shijakasit fitojnë me rezultatin 1-0, pas golit të realizuar nga Hyseni në fund të ndeshjes. Kështu, Erzeni ka arritur të marrë një fitore të çmuar në fushën e vet, në sfidën e luajtur nga Kamzës.
NJë fitore që vjen nga goli i realizuar nga Klaudio Hyseni në minutën e 87-të të takimit. Ndeshja në Stadiumin “Tofik Jashari” në Shijak është zhvilluar e fortë dhe me ritëm. Vendasit të nxitur edhe nga tifozët rrezikojnë që në të 6-ën minutë, me anë të Teqjes. Dy minuta më vonë, provon Kamza me anë të Morinës. Por topi i goditur nga futbollisti kryeqytetas përfundon fare pranë shtyllën pingule të portës shijakase.
Erzeni rrezikon sërish me anë të Rezit, në minutën e 11-të, por topi devijohet nga mbrojtja vendase. 3 minuta më pas, është Troplini që harkon një top në formë krosi brenda zonës, por topi rrok shtyllën. Megjithatë Erzeni këmbëngul. Në minutën e 23-të, portieri Gjonikaj mban të paprekur portën e Kamzës.
Pllari godet bukur, por edhe reagimi i portierit të Kamzës është i menjëhershëm, teksa e grushton topin duke larguar rrezikun nga porta e tij. Me rezultatin 0-0 mbyllen 45 minutat e para. Në fillimin e pjesës së dytë, Erzeni rrezikon sërish, kur portieri i Kamzës, Gjonika kontrollon me vështirësi topin e ardhur nga goditja e Dukës. Në të 62-tën, Selgjinaj gjuan me të majtën nga jashtë zone dhe topi kalon farë pranë shtyllës.
Dy minuta më vonë, Erzeni shënon, por gjyqtari kryesor e anulon golin për pozicion jashtëloje. Duhej të vinte minuta e 87-të që Erzeni të finalizonte me sukses dhe është Hyseni që shënon golin e epërsisë për skuadrën shijakase. Ndërsa në minutën e 90-të, portieri i Erzenit, bën një ndërhyrje të bukur, duke evituar golin e barazimit. Kjo sfidë u transmetua drejtpërdrejt nga Radio-Televizioni Shqiptar.
