ASNN – Tirana ka përfituar më së miri nga humbje 0-3 që Partizani pësoi në Korçë ndaj Skënderbeut, duke mundur të shtunën mimalisht Vllazninë dhe duke marrë kreun e renditjes së Kategorisë Superiore pas 12 javësh. Në takimin e sjellë për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar, goli i vetëm i Takut në pjesën e dytë ka vulosur fitoren e bardhebluve.

Me takimin midis Teutës dhe Elbasani, që është luajtur të shtunën pasdreke dhe është mbyllur me fitoren e papritur të miqve me rezultatin 2-0, ka ngritur siparin java e 12-të të Kategorisë Superiore të Kampionatit Kombëtar të Futbollit, e cila ka vijuar me dy ndeshjet e orës 17:00. Rrjeti i Radio-Televizionit Shqiptar ka sjellë për sportdashësit drejtpërdrejt njërin prej këtyre takimeve, atë midis Tiranës dhe Vllaznisë.

Pjesa e parë e kësaj ndeshjeje është mbyllur me rrjeta të paprekura, ndërsa në të dytën do të vendosë gjithçka goli i Afrim Takut, i realizuar në minutën e 64-t. Pavarsisht përpjekjeve të Vllaznisë, ky gol do të mbetet në fuqi deri në fund, Tirana ka përfituar më së miri nga humbje 0-3 që Partizani pësoi në Korçë ndaj Skënderbeut, duke marrë kreun e renditjes së Kategorisë Superiore pas 12 javësh.

Ndërsa në Korçë, Skënderbeu ka mundur Partizani, që erdhi si kryesues, me një gol të shënuar në pjesën e parë dhe dy në të dytën. Dy takimet e fundit të javës së 12-të të Kategorisë Superiore luhen të dielën, dhe, duke nisur nga ora 13:00, Kukësi pret në fushën e vet Laçin, ndërsa duke nisur nga ora 16:00, Flamurtari është mysafir në Fier për t’u ndeshur me Apoloninë.

Renditjen e Kategorisë Superiore e kryeson Tirana, me 25 pikë, i ndjekur nga Skënderbeu dhe Partizani, me nga 24 pikë, Kukësi me 22 dhe Laçi me 16 pikë.