ASNN – Në Nion të Zvicrës është hedhur shorti për turin e 16-shes së Ligës së Kampioneve. Skuadrat e kualifikuara në përfundim të ndeshjeve në grupe, janë njohur tashmë me kundërshtarët.

Sekretari i Përgjithshëm i UEFA-s, Xhorxhio Marketi, dhe ish-futbollisti i Milanit dhe përfaqësueses së Holandës, Rud Gulit, kanë tërhequr goglat për të përcaktuar çiftet e skuadrave që do të vazhdojnë më tej konkurrimin në Ligën e Kampioneve.

Paris SG-Barcelona dhe Bajern i Mynihut-Arsenal janë dy përballjet që pritet të jenë më interesantet në këtë fazë të veprimtarisë më prestigjioze të futbollit të klubeve të kontinentit.

Shorti i hedhur në Nion të Zvicrës, vendosi që Napoli i Elseid Hysajt të përballet me Real Madridin, ndoshta ekipi më i fortë në Ligën e Kampioneve këtë sezon. Juventus do të përballet me Porton që duket se do të jetë një kundërshtar i lehtë për italianët.

Ndërsa, Mançester Siti do të ndeshet me Monakon. Më poshtë janë çiftet e krijuara, të cilat do të luajnë në 14 dhe 15 shkurt 2017 ndeshjet e para të turit të 16-shes së Ligës së Kampioneve.

Liga e Kampioneve 2016

Shorti i turit të 16-shes:

Mançester Siti – Monako

Real i Madridit – Napoli

Benfika – Borusia Dortmund

Bajern Mynih – Arsenal

Porto – Juventus

Bajer Leverkusen – Atletiko e Madridit

Paris SG – Barcelona

Sevija – Leister Siti