ASNN – Me takimin midis Teutës dhe Elbasani, që është luajtur të shtunën pasdreke dhe është mbyllur me fitoren e papritur të miqve me rezultatin 2-0, me dy gola të shënuar nga Cota dhe Lamcja, ka ngritur siparin java e 12-të të Kategorisë Superiore të Kampionatit Kombëtar të Futbollit, e cila vazhdon sot me dy ndeshjet e orës 17:00.
Rrjeti i Radio-Televizionit Shqiptar do të sjellë për sportdashësit drejtpërdrejt dhe ekskluzivisht njërin prej këtyre takimeve, atë midis Tiranës dhe Vllaznisë. Ndërsa në Korçë, Skënderbeu pret Partizanin.
Dy takimet e fundit të javës së 12-të të Kategorisë Superiore luhen të dielën, dhe, duke nisur nga ora 13:00, Kukësi pret në fushën e vet Laçin, ndërsa duke nisur nga ora 16:00, Flamurtari është mysafir në Fier për t’u ndeshur me Apoloninë.
Renditjen e Kategorisë Superiore e kryeson Partizani, me 24 pikë, i ndjekur nga Tirana dhe Kukësi, me nga 22 pikë secila, Skënderbeu me 21 dhe Laçi, me 16 pikë.
