ASNN – Java e 15-të e Kategorisë Superiore të Kampionatit Kombëtar të Futbollit nis sonte me takimin e parë, atë midis Teutës dhe Skënderbeut. Kjo ndeshje do të sillet për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 18:00.

Sfida që do të luhet në Stadiumin “Niko Dovana” të Durrësit vë përballë njëra-tjetrës dy skajet e renditjes, pasi vendasit ndajnë vendin e 8-të dhe të 9-të me Laçin, me nga 11 pikë secila. Ndërsa korçarët, ndajnë kreun e renditjes me Kukësin, me nga 28 pikë secila.

Katër takimet e tjera të javës së 15-të luhen të shtunën dhe, duke nisur nga ora 14:00, Vllaznia pret në Shkodër Luftëtarin, ndërsa, po në të njëjtën kohë, Flamurtari është mysafir në Kukës për t’u ndeshur me skuadrën vendase. Ndërkaq, duke nisur nga ora 17:00, zbresin në fushën e blertë dy ekipet kryeqytetase.

Tirana do të presë në Stadiumin “Selman Stërmasi” Korabin e vendit të fundit, ndërsa në shtëpinë e tyre të improvizuar, në “Elbasan Arena”, Partizani do të përballet me Laçin.

Kategoria Superiore

Java e 15-të

Të premten:

Teuta – Skënderbeu           (18:00)

Stadiumi “Niko Dovana”, Durrës

Të shtunën:

Vllaznia – Luftëtari              (14:00)

Stadiumi “Loro Boriçi”, Shkodër

Kukësi – Flamurtari             (14:00)

Stadiumi “Zeqir Ymeri”, Kukës

Tirana – Korabi                     (17:00)

Stadiumi “Selman Stërmasi”, Tiranë

Partizani – Laçi                    (17:00)

Stadiumi “Elbasan Arena”, Elbasan