ASNN – Vazhdon thatësira e golave dhe ndërprerja e energjisë elektrike nëpër stadiumet shqiptare, pasi edhe dy ndeshjet e fundit të javës së saj të 14-të të Kategorisë Superiore, kanë premtuar mjaft, por kanë prodhuar vetëm një gol. Ai ka ardhur në Vlorë, në takimin midis Flamurtarit dhe Tiranës, që u soll për sportdashësit drejtpërdrejt nga Rrjeti i Radio-Televizionit Shqiptar.

Në takimin tjetër të mbrëmjes, Partizani dhe Kukësi u ndanë me rrjeta të paprekura, duke ndarë nga një pikë. Kategoria Superiore e Kampionatit Kombëtar të Futbollit ka luajtur të martën në mbrëmje dy ndeshjet e fundit të javës së saj të 14-të dhe 180 minutat e luajtura në Stadiumin “Flamurtari” të Vlorës dhe në atë “Elbasan Arena”, kanë premtuar mjaft, por kanë prodhuar vetëm një gol.

Ai ka ardhur në Vlorë, në takimin midis Flamurtarit dhe Tiranës, që u soll për sportdashësit drejtpërdrejt nga Rrjeti i Radio-Televizionit Shqiptar, por që nuk i shpëtoi sindromës së ditëve të fundit të ndërprerjes, për disa minuta, të energjisë elektrike. Futbollisti nga Kosova, Donjet Shkodra, i cili militon në radhët e klubit vlonjat, ka goditur zgjuarsisht në minutat e fundit të pjesës së parë.

Dhe i ndihmuar edhe nga gabimi në vendosje dhe në reagim i portierit bardheblu, Ilion Lika, Shkodra ka përshëndetur rrjetën. Ky gol u ka mjaftuar vlonjatëve që të mposhtin Tiranën, e cila 17 minutat e fundit i ka luajtur me 10 lojtarë, pas daljes me karton të kuq të Vucajt.

Ndërkaq, në “Elbasan Arena” përtej një goli të Partizanit, të anuluar në minutat e para për pozicion jashtëloje, Partizani dhe Kukësi u ndanë me rrjeta të paprekura, duke ndarë nga një pikë që ruan “status-quo”-në e renditjes.  Pas javës së 14-të, Kukësi dhe Skënderbeu kryesojnë me 28 pikë, të ndjekur nga Partizani, me 25 dhe Tirana, me 22.