ASNN – Për shkak të një defekti të rëndë elektrik, derbi do të vazhdojë të premten në orën 14:00 e do të rinisë pikërisht në minutën e 63-të, aty ku u ndërpre të enjten. Por ndeshja e shumëpritur ka nisur në fakt mjaft bukur në sajë të koreografive të krijuara nga ana e të dy tifozerive.
Eshtë Tirana që rrezikon në 3-ën minutë, kur Karabeci ekzekuton mjaft bukur një goditje dënimi ballore por edhe portieri Hoxha i përgjigjet me një grushtim të bukur. Në minutën e 22-të, është një sulm model I Tiranës. Pasim i saktë i Moises brenda zonës për Sisenë, por ky I fundit nuk gjuan mirë, i penguar edhe nga portieri Alban Hoxha.
Tri minuta më pas është Mervij që i rrëmben një top futbollistëve të Partizanit por gjuajtja e tij nuk është e saktë. Pas këtyre minutave të mira të Tiranës, zgjohet Partizani. Minuta e 32-të dhe Ekubani gjuan bukur me kokë teksa topi përfundon pranë shtyllës pingule të mbrojtur nga Lika.
Në të 38-tën, është sërish Partizani që rrezikon. Ekubani pengohet në vijën e zonës së rreptësisë së Tiranës dhe gjyqtari Jemini jep goditje dënimi. Gjuan Batha, por Lika pret mjaft mirë. Me rezultatin 0-0 mbyllen 45 minutat e para. Deri në minutën e 62-të, kur edhe ndërpritet energjia në “Selman Stërmasi”, rezultati i ndeshjes ishte 0-0.