ASNN – Veprimtaria e dytë e koshit në vend ka luajtur sot gjysmëfinalet dhe Goga Basket dhe Flamurtari janë skuadrat finaliste të Kupës së Shqipërisë në basketboll për femra.
Sikundër ishte njoftuar, të dyja ndeshjet gjysmëfinale u zhvilluan në Pallatin e Sportit “Ramazan Njala” të Durrësit me Flamurtarin që ishte skuadra e parë që e siguroi vendin për në finale pasi mposhti Studentin me rezultatin 95-55.
Flamurtari e vendosi diktatin e saj në pjesën e dytë dhe të tretë kur krijoi diferencën që i siguroi edhe fitoren. Ndërsa Goga Basket mundi në ndeshjen e saj Tiranën me rezultatin 95-61.
Goga Basket e kryesoi ndeshjen gjatë gjithë kohës, por në pjesën e tretë e luajti në kufijtë e perfeksionit duke e fituar 30-7. Finalja mes Flamurtarit dhe Goga Basket do të luhet në pasditen e së martës.
