ASNN – Fundjava rikthen transmetimet sportive në Rrjetin e Radio-Televizionit Shqiptar dhe sot, duke nisur nga ora 14:00, vjen drejtpërdrejt takimi i vlefshëm për grupin A të Kategorisë së Parë, midis Besëlidhjes dhe Besës.
Ndërkaq, duke nisur nga në ora 16:00, në kanalin e dytë tokësor, TVSH, dhe në atë RTSH Sport të platformës dixhitale, direkt nga Pallati i Sportit “Asllan Rusi” do të transmetohet sfida e volejbollit të meshkujve, Farka Volej-Erzeni.
Ndërsa duke nisur nga ora 18:00, transmetuesi publik do të sjellë kryesfidën e fazës së parë, Tirana-Studenti. Ndërkohë, në mbrëmje, duke nisur nga ora 20:45, vjen ndeshja e Euroligës së Basketbollit të Meshkujve, dueli greko-turk midis Panathinaikosit dhe Daryshafakasë.
Të shtunën, Rrjeti i RTSH-së do të sjellë, duke nisur nga ora 14:00, takimin Kukësi-Tirana, të vlefshëm për javën e 12-të të Kategorisë Superiore të Kampionatit Kombëtar të Futbollit.
Ndërsa të dielën, duke nisur nga ora 14:00, transmetuesi publik do të përcjellë emocionet e ndeshjes së vlefshme për Grupin B të Kategorisë së Parë, midis Tomorit dhe Lushnjës.
