Shqipëria e basketbollit të femrave, sonte, në ora 18:00, në Pallatin e Sportit “Asllan Rusi” në kryeqytet do të luajë ndeshjen e fundit të Eliminatoreve të Kampionatit Evropian. Do të jetë përballë Britanisë së Madhe, e cila të shtunën e kaluar është mundur nga Italia në fushën e kësaj të fundit, 52-71. Për rrjedhojë tashmë është jashtë objektivave të veta për të qenë në fazën finale të Kampionatit Evropian, që në verën e ardhshme zhvillohen nga data 16, deri më 27 qershor në Republikën Çeke.

Por përtej kësaj, kombëtarja e basketbollit të femrave i ka humbur dhe dy lojtare të tjera. “Kam qenë i detyruar të ndeshem dhe me dëmtime të tjera, – thotë trajneri Kalaja. – Të dielën është gdhirë me gurë në veshka dhe me dhimbje të forta Mehmeti, kurse të hënën paradite ka pësuar një dëmtim në kavilje Përmeti. Të dyja së bashku janë të pamundura për të luajtur dhe si të tillë duhet të kavërdisemi me “dhjamin” tonë duke shpresuar se do të bëjmë më mirë se sa me Malin e Zi”.

Në fakt në këtë periudhë për shkak dëmtimesh në kombëtaren e femrave kanë munguar Zykaj, Aliaj, Llazar. Jo vetëm kaq, por tashmë e larguar nga basketbolli shqiptar dhe Sokoli. Pse jo dhe motrat Papa, që tashmë janë pjesë e Goga Basket, apo Hoxhaj e Palko. Dhe, me të gjithë këto mungesa. duke krijuar kombëtaren më të mirë të momentit, Kalaja thotë se është i kënaqur. “Sepse kemi shënuar mbi 40% të pikëve që nuk ishin realizuar në ndeshjet e kaluara”, – thotë trajneri veteran.

“Vërtet kemi pësuar mbi 100 pikë, por ama skuadra e ka një koncept për lojën, – ka këmbëngulur Kalaja. – E nëse shfaqemi dhe kështu me Britaninë e Madhe, pse jo të mos tentojmë dhe të fitojmë. Britania e Madhe sigurisht që është kundërshtar i vështirë. Pavarsisht se është mundur të shtunën me Italinë. Sidoqoftë, unë jam i kënaqur me atë që vajzat kanë dhënë, pavarësisht fjalëve që thuhen lart e poshtë. Shpresojmë të bëjmë më të mirën.”