Kapiteni i kombëtares kuqezi merr numrin 15-të tek Tirana, ndërsa është i bindur se kjo skuadër do të bëjë mirë jo vetëm në Ligën Ballkanike, por dhe do të marrë të gjitha trofetë kombëtar. Tirana në basketboll për femra dje në mëngjes, në zyrat e saj tek salla sportive “Farie Hoti”, ka prezantuar blerjen e saj më të re. “Erdhi momenti për t’u kthyer tek Tirana”. Kështu do ta niste deklaratën e tij Gerti Shima, ndërsa i është përgjigjur interesimit të gazetarëve shqiptar tashmë si bardheblu.
“Më bëri kurioz projekti i Tiranës dhe pjesëmarrja e saj në Ligën Ballkanike, – ka vijuar ai. – Nuk ishte e lehtë të mbyllje çdo gjë me SIGAL Prishtinën, sepse kishte dhe një klauzolë kontrata. Por nuk mund t’i thoje “jo” këtij projekti, sepse ishte një erë e re për Tiranën, e cila nisi me fitore në Ligën Ballkanike. Që nga koha kur kam ikur unë Tirana nuk ka marrë asnjë titull. Dhe unë pretendoj që me të gjithë lojtarët që jemi këtu, apo dhe përforcime të tjera ta kthejmë Tiranën tek trofetë.
“Po kështu, të bëjmë më të mirën në Ligën Ballkanike”, ka theksuar Shima, i cili, më pas ka vlerësuar se ishte momenti i duhur asokohe për t’u larguar në Kosovë, edhe pse ishte një basketboll i një niveli më të lartë dhe profesionist në vendin tonë. “Është e vërtetë që duhen dhe fitoret në fushë të huaj, – tha shtatlarti. – Megjithatë duhet eksperiencë në arenën ndërkombëtare, megjithëse ne jemi paraqitur një ekip dinjitoz.”
“Mos harroni që Karposh Sokoli 2000, për shembull, është dhe në Ligën e Adriatikut. E megjithatë ne dhe mund të fitonim atje, ndërsa na kanë munguar lojtarë si Lasku e Vogli. Por shpresojmë që në ndeshjet në shtëpi të bëjmë më të mirën. Nuk është hera e parë që përplasem me ish-skuadrat e mia”, – ka përfunduar Shima, i cili ka vlerësuar si pretendente për titull “kampion” Vllazninë, por pa anashkaluar Teutën dhe Kamza Basket. E Shima debuton në kampionatin shqiptar sot ndaj Flamurtarit në Vlorë
