Kryendeshja e javës së pestë të volejbollit të meshkujve, e cila ka nisur dje në mbrëmje në sallën Nr. 2 të Pallatit të Sportit “Asllan Rusi”, ka qenë Studenti-Erzeni. Shijakasit e Rezart Mukës, të cilët kanë marrë një pjesë të mirë të lojtarëve të Teutës, të mbështetur dhe nga presidenti Markelian Rexhepi, tashmë janë me pretendime serioze për trofe. Dhe në fakt nën dirigjimin e Aldo Dashit e më pas me radhë të lojës së Jurgen Dashit, Parid e Shkëlzen Uruçit, Mokut, Nazifit, Erzeni ka qenë shumë pranë fitores.

Ka marrë setin e parë 20-25. Dhe në të dytin Sako i ka shkundur mirë të tijët. E reagimi është i menjëhershëm, ndërsa është një set që ka përfunduar sa hap e mbyll sytë, 25-15. Kupi, Xhabrahimi, Lundra, Rama, Pepa, Kula, Bërdufi, Sejati, Muça e Baruti në setin e tretë kanë luftuar pikë më pikë, por në fund është Erzeni që ka fituar 25-23. 2-1 për shijakasit e në setin e katërt, teksa kanë kryesuar 20-18, kanë qenë shumë pranë suksesit.

Ka dhe momente nervozizmi e proteste nga stoli i Studentit ndaj dy gjyqtarëve ndërkombëtarë Endri Zguri dhe Arjan Shehu, të cilët kanë pasur ndihmës Anxhelo Brokajn dhe Ardit Nurjan. Aq sa në një moment është ndëshkuar me karton të verdhë trajneri Sako. Por pas kësaj situate, Studenti reagon dhe përmbys e fiton 25-21 setin e katërt. Luhet pikë më pikë në setin final, ndërsa vetëm në fund Studenti ka mundur ta fitojë 15-13 dhe krejt ndeshjen 3-2.

Një ndeshje që është ndjekur dhe nga Presidenti i Federatës Shqiptare të Volejbollit, Erlind Pëllumbi, Sekretari i Përgjithshëm Albens Vokopola e Kryetari i Komisionit të Gjyqtarëve, Konals Gjoka. Në fund një ndarje paqësore, ndërsa Studenti, “kampioni” në fuqi i volejbollit të meshkujve, ka pasur një fitore të vuajtur.

Studenti – Erzeni                              3-2

(20-25, 25-15, 23-25, 25-21, 15-13)

Kampionati Kombëtar

i Volejbollit – Meshkuj

Java e 5-të

(28-29 tetor 2016)

Të premten:

Studenti – Erzeni                             3-2

Të shtunën:

Tirana – Skënderbeu                      ora 13:00

Teuta – Vllaznia                               ora 17:00

Farka Volej – Elbasani                    ora 19:00

Partizani                                            pushim

Renditja

Nr.       Skuadra         N.        F.         H.        Sete                Pikë

1.        Partizani        4          4          0          12-1                12
2. Studenti         4          4          0          12-4                11
3. Farka Volej    4          3          1          10-5                  9
4. Erzeni                        4          2          2            9-6                  7
5. Tirana             4          2          2            8-7                  6
6. Vllaznia         3          1          2            4-7                  3
7. Skënderbeu  4          1          3            3-10                3
8. Elbasani        3          0          3            1-9                  0
9. Teuta              4          0          4            2-12                0