ASNN – Skënderbeu dhe Kukësi do të jetë sfida e parë mes këtyre dy ekipeve në këtë sezon të ri për Ligën Superiore, ndërkohë që kjo është java e 8-të, pra një javë përpara fundit të fazës së parë. Një vit më parë të dy këto skuadra u përballën qysh javën e parë, ndërkohë që këtë sezon shorti i ka vendosur përpara fundit.
Po vjet Skënderbeu dhe Kukësi ndanë nga gjashtë pikë secili duke treguar qartë forcën e shtëpisë që kanë këto dy ekipe, teksa Skënderbeu fitoi të dy takimet në Korcë dhe Kukësi i fitoi të dy ndeshjet që luajti në qytetin verior. Pra vetëm përballë sportdashësve të tyre të dy ekipet japin maksimumin dhe këtë sezon kjo sfidë e parë vjen si për “merak” sërish në stadiumin “Skënderbeu”.
A do të kemi të njëjtat rezultate si një vit më parë, apo historia do të ndryshojë? Kjo mbetet për t’u parë, por që gjithsesi kjo ndeshje mund të quhet pa frikë një nga sfidat “reklamë” të futbollit shqiptar, sepse në fund të fundit në fushë gjithmonë e tillë ka qenë dhe ka kënaqur të gjithë ata që e kanë ndjekur.
Një sfidë që pritet të jetë me gola kjo e nesërmja, teksa asnjëherë në historinë mes këtyre dy klubeve nuk ka pasur ndonjë rezultat të bardhë 0-0. Si Skënderbeu, por edhe Kukësi do të luajnë me synimin e tyre të vetëm për të siguruar tre pikët që vlejnë vërtet shumë në këtë moment që ndodhet sezoni i Superiores.
Katër sfidat e sezonit të kaluar Skënderbeu-Kukësi
10.04.2016 Kukësi – Skënderbeu 1-0
Shënues: Shameti 20’
07.02.2016 Skënderbeu – Kukësi 3-1
Shënues: Salihi 10’, 71’, Xhejms 45’ / Dvornekoviç 58’
19.11.2015 Kukësi – Skënderbeu 2-1
Shënues: Mateus 24’, 54’ / Olajinka 75’
29.08.2015 Skënderbeu – Kukësi 1-0
Shënues: Hristov 54’
