ASNN – Niveli i dytë i Kampionatit Kombëtar të Futbollit, që njihet si Kategoria e Parë, luan sot 3 ndeshjet e fundit të javës së tij të dytë, nga të cilat njëra është në kuadër të grupit A, ndërsa dy të tjerat në kuadër të grupit B.
Në kuadër të grupit A, apo grupit të Veriut, zhvillohet sot takimi midis Besëlidhjes dhe Tërbunit. Kjo ndeshje, që luhet në Lezhë, duke nisur nga ora 14:00, do të sillet për sportdashësit drejtpërdrejt nga Rrjeti i Radio-Televizionit Shqiptar.
Siç dihet tashmë, transmetuesi publik ka nënshkruar një kontratë me Federatën Shqiptare të Futbollit për të transmetuar rregullisht çdo fundjavë 2-3 ndeshje të Kategorisë së Parë.
Ndërkohë, duke nisur nga ora 14:30, luhet ndeshja e fundit e kësaj jave, ajo midis Turbinës së Cërrikut dhe Lushnjës. Në kuadër të grupit B, apo grupit të Jugut, duke nisur nga ora 14:00, luhet të hënën në Berat derbi midis Tomorit vendas dhe Bylisit.
Të shtunën, Rrjeti i Radio-Televizionit Shqiptar solli për sportdashësit drejtpërdrejt dhe ekskluzivisht takimin midis Kamzës dhe Besës, që u fitua nga vendasit me një gol të vetëm.
