ASNN – Edhe niveli i dytë i Kampionatit Kombëtar të Basketbollit për Meshkuj, që njihet si Kategoria e Parë, ka luajtur gjithashtu dje ndeshjen e dytë të javës së saj të dytë dhe në Korçë, Skënderbeu priti Elbasanin, në duelin e skuadrave që kërkonin fitoren e tyre të parë në këtë fillimsezon.

Kjo fitore i ka buzëqeshur skuadrës vendase, e cila ka triumfuar ndaj verdhebluve të drejtuar nga trajneri Arben Xhyra, me 10 pikë epërsi, në shifrat 66-56. Një ditë më parë, në takimin që ngriti siparin e kësaj jave, Teuta ka marrë fitoren e dytë të sezonit, duke triumfuar me 9 pikë epërsi, 76-67, ndaj Studentit.

Dy skuadrat i kishin fituar ndeshjet e javës së parë dhe kjo fitore e djeshme i ka ngjitur durrsakët në krye të renditjes, me 4 pikë, duke i lënë kryeqytetasit në vendin e dytë, të cilin e ndajnë tashmë me Skënderbeun, me nga 3 pikë secila. Renditjen e mbyll Elbasani, që ende nuk e ka shijuar fitoren në këto dy javë të para.

Kampionati Kombëtar

i Basketbollit – Meshkuj

Kategoria e Parë

Java e dytë

(31 tetor-1 nëntor 2014)

Teuta – Studenti                  76-67

Skënderbeu – Elbasani      66-56

Renditja

Nr.       Skuadra         N.        F.         H.        Psh-Pp           Pikë

1. Teuta 2          2          0          155-114         4
2. Studenti 2          1          1          132-127         3
3. Skënderbeu 2          1          1          117-121         3
4. Elbasani 2          0          2          103-145         2