Sllobodan Petrovski është trajneri i ri i Tiranës në basketboll për meshkuj i përzgjedhur në tre kandidatura që deri të hënën në mbrëmje ishin në tavolinën e shefit të klubit bardheblu Spiro Koleka. Përveç tij, ashtu sikurse është shkruar dhe një ditë më parë në Sport Ekspres, kanë qenë edhe slloveni Ziga Mravljak dhe malazezi Bosko Radoviç, i cili ishte një nga ndihmëstrajnerët e Bogdan Tanjeviçit tek Mali i Zi.

Por në fund është vendosur për Petrovskin, që sipas menaxherit të Tiranës në basketboll për meshkuj Melzin Lazimi, vjen sot. “E sot do të diskutohen dhe detajet e kontratës dhe do t’i firmosi ato. E më pas, teksa të jetë rënë dakord për gjithçka, do të marrë në dorë skuadrën dhe do të nisë përgatitjet. Por ai do të jetë trajneri i parë i Tiranës”, – thotë Lazimi.

Tashmë, tek bardheblutë e koshit, që pas shumë vitesh rikthehen në një veprimtari zyrtare ndërkombëtare, ka nisur një erë e re. Liga Ballkanike, por dhe kampionati e Kupa e Shqipërisë do të jetë një impenjim i madh për të gjithë ata që do të veshin fanellën e kësaj skuadre. Sigurisht që edhe mbështetja e tifozerisë do të jetë maksimale.

Kjo, pavarësisht se Tirana ndeshjet ndërkombëtare do t’i luajë në Pallatin e Sportit “Asllan Rusi”, sikurse ndodh me fazën finale të “play-off”-it për titullin “kampion”. Petrovski është trajneri i ri i Tiranës në basketboll për meshkuj me një përvojë në drejtimin e skuadrave maqedonase, sidomos të atyre që kanë marrë pjesë në Ligën Ballkanike. E përkrah tij do të jenë dhe Borova e Ago.

Skeda e Sllobodan Petrovskit

Datëlindja: 11 shkurt 1970

Vendlindja: Shkup

Kombësia: Maqedonase

Gjatësia: 1.95 metra

Roli: Organizator

Karriera si lojtar:

1989-1994                 MZT Shkup

1994-1995                 Zito Vardar

1995-1998                 MZT Shkup

1998-2001                 Nikol Fert

2001-2005                 Vardar Shkup

Karriera si trajner:

2009-2010                 Vardar Osiguruvanje

2011-2012                 Torus

2013-2014                 Strumica