Tirana e futbollit të sallës është “dramë” në paraqitjen e saj në Kupën UEFA në futbollin e sallës. Pasi është mundur 4-2 nga Brezje Maribor dhe 8-3 nga Zdunska Vola vjen një tjetër disfatë. Këtë herë nga kampionët e Luksemburgut, Munsbah, që pjesën më të madhe duket se e kanë me lojtarë brazilian.
E për më tepër me trajner italian. Pas një pjese të parë rezistente, ku Musbahu ka kaluar në epërsi në të 4-ën minutë me anë të Stive Da Silvas, shkatërrimi për Tiranën vjen në pjesën e dytë. Ka barazuar për momentin Selmanaj, por në harku kohor të një minute janë shënuar tre gola.
Fabio Gaspar realizon një dygolësh, shënon edhe Rikardo Korrela dhe 4-1. E ai që i vë vulën është portieri Pedro Marinjo. 5-1 për Munsbah dhe një turpërim i madh i Tiranës në Kupën UEFA në futbollin e sallës. Tre humbje të pësuar dhe 6 gola të shënuar e 17 të pësuar.
Identike paraqitja e bardhebluve si para 6 vjetësh në Maltë (1-3 Ilves Tampere, 4-5 me FUTSAL BGA Kopenhagen dhe 2-4 me ZC Ekses Futsal), ndërsa Tirana duket se ka mbetur në “vendnumëro” në futbollin e sallës .
Munsbah – Tirana 5-1
Shënues: Stive Da Silva 4’, Fabio Gaspar 28’, 29’,
Rikardo Korrela 29’, Pedro Marinjo 35’ / Selmanaj 23’
E shtunë, 20 gusht 2016, ora 18:00
në “Dvorana Tabor”, Maribor
Munsbah: Pedro Marinjo, Stive Da Silva, Karlo Soares, Rafael Dos Reis, Rikardo Korrela / Hamilton Fernandez, Luka Lopez, Daniel Perez, Fabio Gaspar, Zhoise Varela, Patrik De Souza, Vilson Markez, Dilan Almeida. Trajner: D.Laporta
Tirana: Nebiu, Gjoni, Xhaferraj, Çela, Selmanaj / Metani, Nikolli, Gockaj, Lika, Sina, Skanja. Trajner: A. Pisha
Gjyqtarë: D. Berri (Irlandë), J. Jiangio (Qipro)
