Sidni Hoxha, notari më i mirë shqiptar i kohëve të fundit, për më tepër pjesëmarrës në tre olimpiada për vendin tonë (Pekin 2008, Londër 2012, Rio 2016), dje ka marrë një fitore në baterinë e parë kualifikuese në 50 metra stil i lirë për t’i mbyllur gojën të gjithë atyre që nuk e deshën. Sepse në të vërtetë, përtej dëshirës për të treguar “e-mail”-et e korrespondencës me Federatën Botërore të Notit, gjërat nga nisin mbrapsht që nga Federata Shqiptare e Notit.

Pasi konfirmimet e dy normave B në 50 dhe 100 metra stil i lirë nuk ishte e vështirë t’i merrej, aq më tepër që ai ka bërë gara në Shtetet e Bashkuara të Amerikës me ata që sot ngjiten lehtësisht në podiumin e medaljeve. E më tej akoma vazhdon me gafat e Komitetit Olimpik Kombëtar Shqiptar që mungon në mbledhjen teknike, pasi nuk shkon as trajneri që është vendosur për të shoqëruar dy notarët Merizaj e Hoxha, dhe regjistrohet në 50 metra stil i lirë me një kohë që nuk është e tij.

Madje, sipas të gjitha burimeve, në mbledhjen teknike nëse do të ishin pyetur drejtuesit e delegacionit shqiptar, jo vetëm që kishte vend për të shtuar Hoxhën të paktën në 100 metra stil i lirë, por me krahëhapur për rritjen e audiencës së notit në Lojërat Olimpike do ta kishin shtuar dhe një bateri me shqiptarin e me të tjerë notarë që më shumti delegacionet olimpike i pyesin dhe marrin konfirmimin e sportistit nëse duan të garojnë apo jo.

Mirëpo nuk ndodh… Hoxha është në baterinë e parë, ndërsa është e dukshme me sy diferenca që ka ai me kundërshtarët e tij, aq sa me vendin e parë bëhen gati dy sekonda diferencë. 22”80 që konfirmon formën optimale të këtij sportisti, që me një dashamirësi më të madhe në trajtim, mund të kishte dhënë dhe më shumë. Nuk është faji i tij që në 12 bateri eliminatore, i fundit i kualifikuar më tej është me kohën 22”10. E megjithatë Hoxha e bëri garën e tij.

Fitoi në baterinë e parë dhe theu rekordin kombëtar nga 22”80 në 22”87.