Pogradeci u bë mikpritësi i etapës së 4-t të Rrethit të 73-të Çiklistik të Shqipërisë, e cila ka pasur për itinerar Durrës-Pogradec 166 kilometra e gjatë. Një etapë që pati luftë të fortë sportive edhe për faktin se ishte më e gjata e këtij turi çiklistik. Pogradeci kishte festë të dyfishtë pasi ardhja e çiklistëve përkonte me hapjen e sezonit turistik. Nga ana tjetër ishte momenti për të kujtuar dhe nderuar dhe kampionin e parë të çiklizmit pas çlirimit pogradecarin Pirro Angjeli.

“Ishte një garë e vështirë, – thotë sekretari i garës Abedin Guzja, – sepse edhe temperaturat ishin mjaft të larta që kanë ndikuar dhe në cilësinë e garës. Çiklistët treguan vullnet për ta përfunduar me sukses. Pas kalimit të Librazhdit, shkëputen dy çiklistë, Ardit Çuka i Apolonisë dhe Klindi Gremi i Tiranës. Pa filluar Qafa e Thanës dy të parët u arritën nga çiklistët e tjerë. Majën e pushtoi Ardit Çuka i Apolonisë i ndjekur nga Banushi dhe Sefa.”

“Në zbritje diferenca ishte 25 sekonda, – ka vijuar ai. – Në stacionin e Gurit të Kuq, dyshja u arrit nga Gremi dhe nga çiklisti i Malit të Zi, Demir Muliç”. Në finish ka hyrë i pari Ylber Sefa, i cili ka qenë i ndjekur nga Besmir Banushi dhe Demir Muliç. Çiklisti i Tiranës, i cili është vetëm një etapë larg triumfit, ndërsa pritet të kurorëzohet sot në mbarim të etapës Pogradec-Kërrabë, 109 kilometra, është kryesuesi i renditjes së përgjithshme të Rrethit të Shqipërisë.

Dhe si ekip kryeson Apolonia, që kështu duket se nuk do të ndahet nga trofeu i Rrethit të Shqipërisë. Ndërkohë, Presidenti i Federatës Shqiptare të Çiklizmit, Skënder Anxhaku, ka falënderuar Kryetarin e Bashkisë Pogradec, Eduard Kapri, për mikpritjen. E ky i fundit ka dorëzuar kupën për fituesin e etapës, Ylber Sefa, ndërsa në mbrëmje çiklistët kanë qenë të ftuar në festimet për hapjen e sezonit turistik për qytetin buzë liqenit.

Rrethi i 73-të Çiklistik i Shqipërisë

Rezultatet teknike të etapës së 4-t

(Durrës-Pogradec, 166 km)

Nr.       Çiklisti (Skuadra)                 Koha

1. Ylber Sefa (Tirana)              4h21’17”
2. Demir Muliç (Mali i Zi)                + 1”
3. Ardit Çuka (Apolonia)                + 2”

Renditja e përgjithshme individuale pas 5 etapash:

Nr.       Çiklisti (Skuadra)                 Koha

1. Ylber Sefa (Tirana)              12h27’54”
2. Besmir Banushi (Apolonia)           12h28’55”
3. Goran Celoviç (Mali i Zi)     12h31’50”

Renditja e përgjithshme ekipore pas 5 etapash:

Nr.       Skuadra                     Koha

1. Apolonia                    37h32’12”
2. Tirana                         37h41’14”
3. Mali i Zi                      37h42’00”