Kishte ardhur nga Italia, ku jeton prej vitesh me familjen e tij, posaçërisht për të ndjekur Rrethin e 73-të Çiklistik të Shqipërisë, por krejt papritmas, ish çiklisti i Vllaznisë dhe i kombëtares shqiptare, Aleksandër Lazri, ndërroi jetë pasditen e mërkurës pas një aksidenti automobilistik. Pasi kishte qenë së bashku me të gjithë pjesëmarrësit e Rrethit në rolin e një shoqëruesi zyrtar të Vllaznisë, Aleksandër Lazri ndoqi prej së afërmi etapën e djeshme Tiranë-Shkodër.
Nga sa bëhet e ditur, gjatë udhëtimit me një motor sportiv drejt komunës Guri i Zi, në periferi të qytetit, humbja e ekuilibrit e ka rrëzuar për tokë duke marrë dëmtime të rënda, aq sa rrugës për në spital ka ndërruar jetë. Me vdekjen e tij në një moshë kaq të re, 36-vjeçare, familja “Lazri” humbi djalin e tyre të dashur, bashkëshortja dhe fëmijët prindin shembullor, por në të njëjtën kohë edhe sporti shkodran humbi një nga emrat e spikatur të çiklizmit të qytetit verior dhe atij shqiptar.
Jo shumë larg në kohë ai ka pedaluar në një ekip me të madhin Agim Tafili, Leonard Kolën, Brahim Sykjen duke qenë përfaqësuesi më i ri i atij brezi të rinj që nën drejtimin e trajnerit Ruzhdi Muriqi vijoi më pas të ishte pjesë e rëndësishme, jo vetëm e Vllaznisë por edhe e kombëtares shqiptare. Edhe pse i larguar gjatë periudhës së fundit në Itali, ku jetoi dhe punoi me familjen e tij në Firence, asnjëherë nuk u shkëput nga sporti i tij i preferuar.
Së bashku me mikun e tij të afërt, trajnerin e sotëm të Vllaznisë, Leonard Kola morën përsipër rindërtimin e ekipit kuqeblu ku falë dashamirësisë së tij, çiklistët shkodranë u pajisen me një bazë materiale shumë efikase. Pikërisht në kohën më të mirë vjen kjo goditje fatale duke e ndarë atë përfundimisht nga familja, shoqëria dhe sidomos mjedisi çiklistik që ai aq shumë e dashuronte. Redaksia e gazetës “Sport Ekspres” i përcjellë familjes së të ndjerit ngushëllimet më të sinqerta për humbjen e djalit të tyre në një moshë të re.
