ASNN – Një nga pretendentet për kurorën kontinentale, e ka nisur pjesëmarrjen e saj në “Euro 2016” me një fitore të pastër, 2-0, ndaj Belgjikës. Pas asaj në vitin 2000, kjo e mbrëmshmja ishte hera e dytë që Italia e nis një Kampionat Evropian me fitore. Ashtu si kampionia në fuqi e botës, Gjermania, edhe Italia e ka mposhtur Belgjikën me rezultatin 2-0, në ndeshjen e dytë të Grupit E në “Francë 2016”, duke konfirmuar statusin e saj si pretendente për kurorën kontinentale në Evropianin e këtij viti.

Por, për të krijuar momentin e parë të rrezikshëm, Italisë iu nevojitën 29 minuta, me Pelenë që nuk inkuadroi si duhet, por në minutë e 32-të, të kaltërit gjetën golin e epërsisë, me Xhakerinin. Sulmuesi i Bolonjës shfrytëzoi në mënyrën më të mirë të mundshme pasimin e gjatë të Bonuçit, duke thyer gardianin e portës belge, Kurtua. Pas golit të parë të pësuar, mori iniciativën në fushë, por pavarësisht numrit të madh të rasteve, belgët nuk arritën të barazojnë, madje pësuan edhe një herë.

Graciano Pele finalizoi me sukses një kundërsulm të axurrëve dhe ekzekutoi bukur një goditje të fuqishme nga afërsia në minutat shtesë, gol ky që vulosi gjithçka. Tani Italia kryeson tanimë renditjen e Grupit E me 3 pikë, dy më shumë se Irlanda dhe Suedia që më herët barazuan 1-1. Belgjika, që konsiderohej midis favoriteve për të fituar kampionatin, është e fundit pa pikë.