Kombëtarja Nën-16-vjeçarëve e basketbollit të djemve, që drejtohet nga Afrim Bilali dhe ndihmësit e tij Mikel Serbo dhe Henri Moja, dje ka zhvilluar stërvitjen e katërt. Është përzgjedhur palestra e shkollës 9-vjeçare “Qazim Turdiu” në Tiranë, ndërsa Bilali ka pasur në dispozicion 24 lojtarë, të cilët janë fryt i përzgjedhjes së parë në 3 ditë, nga data 25, deri më 27 maj 2016.

Si për trajnerin Bilali, ashtu dhe për ndihmësin e tij Moja, stërvitja ka shkuar shumë-shumë mirë. “Tek kjo stërvitje kanë qenë në dispozicionin tonë 24 lojtarë me të cilët u qartësuam më tepër për ato që do të kemi në vazhdim, – ka theksuar trajneri kuqezi. – Sigurisht që do të ketë edhe shkurtime të tjera, por jo tani. Të hënën e ardhshme do të kemi dhe një takim në Federatën Shqiptare të Basketbollit.”

“Atje ku do të nxjerrim konkluzionet e këtyre përgatitjeve për të bërë më të mirën në vazhdim”. Ndërkohë ndihmëstrajneri  i kësaj kombëtareje, Henri Moja, ka pranuar se është një skuadër që ka gjatësi. “Kemi 5 apo 7 lojtarë të cilët janë mbi 2 metra dhe që do të jenë e ardhmja e basketbollit, por është skuadër që do punë për të arritur aty ku ne duam”, – ka theksuar nr. 2 i stolit kuqezi të Nën-16-vjeçarëve të koshit.

Kështu, kombëtarja e Shqipërisë për këtë grupmoshë do të marrë pjesë në Divizionin C të Kampionatit Evropian të Basketbollit për Meshkuj, ndërsa në grupin B do të jetë përballë Gjibraltarit, Moldavisë, Andorrës e Armenisë. Dhe gjithçka do të ndodhë nga data 15, deri më 24 korrik 2016, në Nikozia të Qipros.