ASNN – Përballja midis Shqipërisë dhe Rumanisë do të niste vrullshëm për të dyja ekipet, teksa fillimisht provon Ficzai për mikesha dhe Velaj për vajzat kuqezi. Sidoqoftë, pak e nga pak, rumunet e zhvendosin lojën në gjysmëfushën tonë dhe ushtrojnë presion. Mirëpo, në dy raste, rumunia Rus nuk ia del ta dërgojë topin në rrjetë.
Minutat kalojnë dhe kombëtarja kuqezi mbrohet mirë, në ndonjë rast edhe tenton ta zërë në befasi kundërshtarin, por pa rezultat. Në minutën e 43-të do të vinte edhe goli i parë i ndeshjes me anë të Vatafusë, teksa me një goditje dënimi perfekte e dërgon topin në trekëndësh. 0-1 dhe nuk ka më kohë në pjesën e parë.
Fraksioni i dytë i lojës nis me një Shqipëri më këmbëngulëse, por mungon forca goditëse në sulm. Rumunet qarkullojnë topin dhe shfaqen rrezikshëm, por sërish goli do të vinte nga një goditje dënimi si në rastin e parë. E njëjta autore, e njëjta goditje dhe e njëjta saktësi. Vatafu e dërgon në rrjetë sferën dhe 0-2 në minutën e 67-të.
Për t’i dhënë goditjen përfundimtare Shqipërisë mendon sërish Vatafu, teksa pas një krosimi nga këndi godet në afërsi të zonës dhe shënon. 0-3 dhe Rumania tashmë e ka siguruar fitoren e saj, ndërsa Shqipëria e futbollit të femrave është dorëzuar përpara forcës së kundërshtarit.
Shqipëri – Rumani 0-3
Shënuese: Stefania Vatafu 43’, 67’, 78’
E enjte, 2 qershor 2016, ora 17:00
në stadiumin “Elbasan Arena”
SHQIPËRIA: Zani, Proto, Franja, Rrahmani, Bajraktari, Morina (Begolli 80’), Velaj, Hashani (Jashari 72′), Doçi, Gjini, Krasniqi. Trajner: A. Grima
RUMANIA: Paraluta, Goder, Havristiuc, Bortan (Tarasila 72’), Ficzai, Vatafu, Rus, Herczeg (Ciolacu 37’), F. Olar, Lunca (Popa 81’), C. Olar. Trajner: M. Albon
GJYQTARE: L. Ote, E. De Vries, S. Forde (Belgjikë)
KARTONË TË VERDHË: Franja / Vatafu
