ASNN – Kombëtarja shqiptare zhvillon seancën e fundit stërvitore, De Biazi bën prova gjenerale para Ukrainës. Kombëtarja shqiptare u dha fund përgatitjeve në Austri, duke zhvilluar seancën e fundit stërvitore përpara ndeshjes miqësore kundër Ukrainës. Kjo sfidë është dhe testi i forcës për përfaqësuesen kuqezi në prag të debutimit në Euro 2016. Ajo e mërkurës pasdite ishte seanca e fundit stërvitore për kombëtaren e Shqipërisë në grumbullimin e saj 10-ditor në Austri.
Me Xhovani De Biazin si gjithmonë në vëzhgim dhe duke mbajtur shënime, seanca u drejtua nga ndihmësit e tij të kryesuar nga zëvendëstrajneri Paolo Tramexani. Ashtu sipas programit përgatitur, futbollistët kuqezi morën në fillim ngarkesën fizike, ndërsa më pas stërvitja u fokusua te situatat e ndryshme taktike me të cilën kuqezinjtë mund të përballen gjatë lojës në ndeshjet e ardhshme, duke nisur nga ajo miqësore kundër Ukrainës.
Gjithmonë i kujdesshëm gjatë gjithë grumbullimit në Austri për të mos zbuluar zgjedhjet teknike dhe taktike, në seancën e fundit, De Biazi dha disa shenja në lidhje me skuadrën që do të zbresë në fushë mbrëmjen e së premtes. Ukraina nuk është si Katari, ndërsa konsiderohet si testi i forcës përpara debutimit në finalet e Euro 2016. Kështu nga minuta e parë pritet të zbresin në Stadiumin “Atleti Azzurri” të Bergamos ata lojtarë që me shumë mundësi do të jenë baza e formacionit kuqezi që do të luajë në ndeshjet e grupit A.
Synimi është një skuadër e kujdesshme në modulin e lojës me 4 mbrojtës, 5 mesfushor dhe 1 sulmues. Në këtë repart balotazhi është i fortë, por pas golit të shënuar kundër Katarit më i favorizuar është Armando Sadiku.
