Kombëtarja e Nën-20-vjeçarëve, nën drejtimin e trajnerit malazez,Darko Vujaçiç, ka nisur përzgjedhjen e saj në prag të pjesëmarrjes në Kampionatin Evropian të kësaj moshe, në Divizionin B. Siç dihet Shqipëria e Nën-20-vjeçarëve do të konkurrojë në grup me Greqinë, Britaninë e Madhe, Holandën, Irlandën dhe Kosovën, ndërsa ndeshjet zhvillohen në Halkidhiqi të Greqisë, nga data 17, deri më 24 korrik 2016.

Për t’u evidentuar është fakti se janë të gjithë lojtarë, të cilët aktivizohen nëpër ekipe të para. E si të tillë dje kanë munguar lojtarët e Teutës dhe Vllaznisë, të cilët janë në “play-off”-in për titullin “kampion” në basketboll për meshkuj, që pritet të zgjidhet ose nesër në Durrës, ose të shtunën në Shkodër. Në stërvitje janë paraqitur 34 lojtarë, prej të cilëve Vujaçiç duket se do të zgjedhë 17.

Ndërsa 7 apo 8 të tjerë, të cilët do të plotësojnë 25-shen e Evropianit vijnë nga Teuta dhe Vllaznia. Dje malazezi nuk ka dhënë ndonjë përfundim, edhe sepse u ka deklaruar lojtarëve se kanë qenë të plogësht. Për rrjedhojë do të kenë edhe një shans sot në stërvitjen e dytë dhe të fundit, e cila do të zhvillohet nga ora 17:00, deri në ora 20:00, në Pallatin e Sportit “Asllan Rusi” në kryeqytet.

Më 3 qershor në Federatën Evropiane të Basketbollit duhet dorëzuar dhe lista zyrtare e Shqipërisë së Nën-20-vjeçarëve. Sidoqoftë, tashmë ka nisur të ndihet vera e basketbollit shqiptar, e cila përmbledh 7 ekipe kombëtare në garë, që janë Nën-16-vjeçarët djem e vajza, Nën-18-vjeçarët djem e vajza, Nën-20-vjeçarët djem, të rritur dhe të rritura.

Dhe, pas Nën-16-vjeçarëve dhe Nën-20-vjeçarëve djem, pritet të nisin përzgjedhjet edhe për kombëtaret e tjera.